Mizoram Larsap Dr. Hari Babu Kambhampati chuan ZPM-in sorkar an siam theih thu an thlen chu a pawm a, Zoram People’s Movement Leader Lalduhoma hnenah chief minister thar atan appointment a pe.
ZPM leader leh a tawiawmtu, Working President K. Sapdanga leh Vanlalhlana te chuan sawm an nih angin nimin chawhma khan khan Larsap Dr. Kambhampati chu an chenna, Raj Bhavan-ah an hmu a, sorkar siam tura an party an tlin thu official-in an hriattir a. Larsap hian an thu thlen chu a lo pawmsak a, chief minister thar atan Lalduhoma hi appointment a pe nghal a ni.
Hemi hnua chanchinbu miten an kawmnaah Lalduhoma chuan ZPM kaihhruai sorkar chu December 8, 2023 (Zirtpawni)-ah lak luh a ni dawn tih sawiin, hemi ni hian pro-tem speaker an thlang nghal dawn tih te, December 12, 2023-ah sorkar thara assembly rorel inkhawm hmasa ber neih a ni dawn tih a sawi.
ZPM MLA thlan tharte chu Thawhlehni zan dar 8 khan an leader chenna in, Chawlhmunah an thukhawm a, legislature party hruaitu tur an thlang a. ZPM Working President leh Aizawl North III bial atanga MLA atana thlan tlin, K. Sapdanga rawtna angin legislature party leader atan Lalduhoma chu lungrual takin an pawm a, Lalduhoma’n a rawt angin deputy leader atan K. Sapdanga chu lungrual takin an pawm bawk a ni.
Nimina larsap an kawm zawh hnua chanchinbu miten an kawmnaah Lalduhoma chuan larsap hian full coperation a pek tur thu leh central lamah pawh a tangkai thei ang bera pui turin a inhuam thute a lo hrilh tih a sawi a, “Larsap hian Centrally Sponsored Schemes (CSS) chu sorkar hmasa aia hmang tha zawk tur leh tun aia tam zawk pawisa dil chhuak thei tura hnathawk chak turin min ngen,” a ti a, hemi kawngah hian tan lakpui a inhuam thu larsap hian a hrilh niin a sawi bawk.
Naktuk maia Mizoram chief minister atana lak luh tur, Duhoma chuan Manipura Zo hnahthlakte buaina chungchang chu bawhzui an tum thu sawiin, rorelna hran an ngiat chungchangah te hmalak chho zel an tum a, union home minister nen pawh an inbe tawh a, a rang lama Delhi-ah kala sorkar laipui hotute sawipui an tum thu a sawi a. Manipur Zo hnahthlakte chu sorkar tlaten an lo enkawl dante chhunzawm an tum a, a aia tha zawka tih theih dante pawh a awm em tihte ngaihtuah chhoh zel an tum thu a sawi a; Myanmar raltlante pawh tha taka enkawl zui zel an nih theih nan hma an la zel dawn tih a sawi bawk a ni.