MNF party-in an president, Zoramthanga’n a nihn atanga bânna a theh luh chu an pawm lo.
Zoramthanga bânna theh luh chungchang hi nimin khan MNF Sr Vice President Tawnluia hovin an party thuneitu sang, National Core Committee (NCC) leh Political Affairs Committee (PAC) ten Mizo Hnam Rûn-ah an ngaihtuah a. An thutkhawm zawha thu thar thehdarhtute an kawmnaah Tawnluia chuan an pawm loh thu a puang.
MNF Sr Vice President chuan Zoramthanga bânna theh luh chungchang an ngaihtuah thu sawiin, kumin Mizoram inthlanpuia MNF party-in sorkarna a chan zawh tak loh avanga MNF president-in a nihna atanga bânna a theh lut chu zahawm an tiin, a puitlinzia tilangtu nia an hriat thu a sawi.
Tawnluia chuan, “Tun inthlana kan chak lohna hi ama (Zoramthanga) mawhphurhna bik ni lovin, kan zavaia mawh a ni a. President atanga bân a rawn dil hi meeting chuan a pawm lo va. Chuvangin, MNF president a nihna hi chelh zui zel se kan ti,” a ti.
Tar lan tawh angin kumin MLA inthlanpui neih zawh taka a kaihhruai party-in hnenah an chan zawh loh avangin a mawhphurhnaah ngaiin, Thawhlehni khan MNF president Zoramthanga hian Tawnluia hnenah president a nihna atanga bânna a theh lutin, pawmsak ngei turin a ngen a. Hemi chungchang hi NCC leh PAC ten ngun taka an ngaihtuah hnuah an pawmsak loh thu resolution an siam a ni.