Gujarat-a Gandhinagar khawpuiah, Swaminarayan temple atangin cardiologist Dr. Tejas Patel chuan a awmna atanga km 32 vela hlaa damlo awm, lung zai ngai chu hlawhtling takin a zai tlat mai!
Dr. Patel hi temple complex-ah hian a thu daih a, hmeichhe pakhat, Apex Hospital-a awm lunga thisen zam pakhat chu hlawhtling takin a zai thei a, hei hi telerobotic coronary hmasa ber nia hriat a ni.
Hetianga ralkhat atanga inenkawlna hi tunlai thiamna sang tak hmanga duan chhuah a ni a. Internet hmangin khawl (robotic arm) chu lung thla lakna hmun (cath lab) nen thlunzawmin operation theatre-ah damlo nen an dah a, chu chu ral atangin Dr. Patel hian robot chu thununin a zai tihna a ni.
A hmunah amah awm lo mah se doctor leh paramedic rualin damlo chu OT-ah a dinhmun lo ngaihvenin an awm ve thung.
He hmeichhia hi tun hnai lawkah heart attack recently a nei a, a lunga thisen zam pakhat chu thisenin a hnawh a. Nilaini khan Dr. Patel-a ho hian robot hmang hian hlawhtling takin an zai ta a ni.
“Vawiin hian damlo chu km 32 danah daih a awm a, tun atanga rei loteah chuan ram chhunga doctor thiam tak takte hian, tuna kan tih ang hian ral atang pawhin damlo chu an enin an zai thei tawh ang a, ram dang daiha mi pawh tuna kan tih ang hian awlsam takin a tih theih tawh ang,” tiin Dr. Patel chuan a sawi.
Dr. Patel hian mi zai thiam tu pawhin, cath lab, robotic arm leh internet connection rintlak leh tlo a neih phawt chuan hetianga a tih ang hi an ti thei vek niin a sawi bawk.
A zaina hmanrua (robot) siamtu, US-a Corinsus-a an CEO Mark Toland chuan telerobotic surgery hi a hmasa ber chu kum 2001 tih a lo nih tawh thu leh Atlantic tuipui kânin, laparoscopic gall bladder zai hlawhtling takin an lo ti tawh tih a sawi.
“Tun tuma mi erawh lung a ni a, khawvelah a hmasa ber niin a lang a. Hetiang thiamna hmang hian, mi zai thiam, Dr. Patel te ang hi chuan a mamawhtute hnenah ralah pawh damna an thlen thei dawn a ni,” a ti.
Dr. Patel hian robotic surgery hi vawi 300 chuang a ti tawh a, kum hnih vel a inbuatsaih thung a. “Technology thar a lo thlen khan ransa velah ka inzir hmasa,” a ti a, thiam a intih hnuah mihringah a ti ta tih a sawi.