Kan ram harsatna sawikhawmna tak takah chuan a bul ber chu eirukna hi ani ti ila kan sawisual tam awm love. Eirukna avangin ram rorelnaah kan in hmuh dan a khawlo zo tawh a. Tu pawh mai hi mi tha ena in en a har a. Kan in ringhlel thûm tawh mai a. Kan political party te lah chuan anmahni rorelna hnuai anih loh chuan sawrkarna chang lam chu eiru a pawisa siam tum ringawtah an puh tawh bawk. A chhungah mi rinawm an awm reng an ring lo a ang ber. Chutiang chu kan inhmuh dan anih avang chuan khawtlangah kan inringhlel a. Hnam inringhlel takah kan chhuak ta.
Eirukna hi kan ram thanmawhbawk ani tih hriain 1983 velah khan kohhran lian ber presbyterian kohhran chuan eiruk do kum hial a lo puang tawh a. Mahse, vawiin ni thlengin he thil tha lo min chenchilh tlattu hian min la kalsan chuang lova. Min luhchilh thuk tulh tulh emaw tih mai turin a hmanna tur nilova sum kal ral a tam em em a. Hmasawnna pawisa lokal zat nia kan hriat kan leh kan hmasawnna chu a in hen lo lutuk tiin kan lung a awi lova. Sawrkar siam party apiang kan ringhlel a. Anni lah an lo fihlim lo tlangpui zel bawk. Sawrkar thar kan hmuh apiang chu in hausak chhawk tur hmuhin kan hmu a.
Tunah chuan he boruak hi mipui hian kan kham ta takzet a. Sawrkar thar rawn siam tan mekte lakah beiseina sang tak kan han nei leh phawt chu a ni a. Engnge an an dawn kan hre lova. Eirukna umbo tur hian eng rahbi nge an rah hmasak ang tih kan en thup a. An chet dan a bul atangin kan lo chhiar kauh kauh dawn a ni. Eirukna do tur hian a hmasa berin mahni lamin duh loh hmasak a ngai a. Chu chu mipui beisei chu a ni. Chumi dawt lehah chuan eirute hrem ngam kan beisei bawk. Eirukna sawi hlawh, sum siamna sawi luih luih hlawh hlawh lo awm tawhte hi an ngawihsan mai dawn nge an chhui chhuak ang a, mipui chanai lo ti chheprelh tute chu an hrem ang. Tun hnaiah mai pawh dik lo taka tender (restricted tender) hmanga in duhsakna tenawm tam tak kan hmu a. Hengte hi an enlet ang a, an hrem ang tih hi mipui beisei a ni. Kal tawh anih avanga an ngawihsan chuan anmahni pawh tih ve duh vanga ngawi ralah kan puh ang. Hun hmasa lamah pawh dik lo an hrem ngam loh chuan anmahni an inbarh lut zui ve thin tih kan hmu a. Chu rinhlelhna mit chuan kan melh reng dawn a ni. Mizote hi hnam tlemte, in chhungkhat laina hnai them mai kan ni a. Kan in hmaizah a. Tha lo taka han in chhui kan hreh thin bawk. Heng inhmaizahna te hi eirukna tibo turin kan kaltlang pawp a ngai a. Kan in hrem ngam lohna hian hlet a nei zui thin. Helai tak kaltlang ngam sawrkar hi ani kan beisei ni.
Kan sawrkar thar ten hun kal tawh chu hun kal tawh ani e an tih chuan eirukna chu chhuah zalen ani leh ta kan ti nghal ang. Hei hi hre rengin kan sawrkar hian hun kalliam tawha thil thleng duhawm lote han bitum chat chat se, mipui pawhin kan thlawp ngei ang.