Democracy ram kan nih ang ngeiin kan ram hruaitu turte mipuiin kan duh kan thlang a. Nimin lamah dan angin mipui tana thawk tura thutiam lain Mizoram governor in a la lut fel ta a. Sawrkar inrelbawlna dan famkim angin hna an thawk thei dawn ta a. A lawmawm hle mai. Mahni chunga roreltu tur thlang ve thei ngai lo, tharum leh tihluihna hnuaia awm ramte lakah kan vanneihzia a lang nawn leh thin.
Inthlanah party hrang hrang ten roreltu nih tumin theihpatawp an chhuah vek a. Tan pawh an tang narawh e. Chutiang karah chuan tuna mite hi thlanchhuah an ni ta a. Mipui rorelna dik tak a ni. Anni lam ve thung chuan inthlan dawna mipui hnena an kaldan tur an sawi zawng zawng tihlawhtling tura hnathawh kha an tih tur a ni ta. Mipui hmaah thil tha, ram kalphung dik leh inkaihhruaina duhawm zawk tam tak min tiam a. Hmasawnna duh mipui pawhin an thusawi kan lem duak duak anih kha. An thusawi tha zawng zawng kha kan vawng a, kan pai reng a. A hlawhtlin hun tur kan thlir dawn a ni.
Chutih rualin dwmocracy ramah mipuiten hruaitu tha kan mamawh ang tho in mipui pawhin kan duh taka kan thlante thu awih phawt hi kan bat a ni ve thung ang. Hruaitu tha chauh duh, mipui lamin zawm tum chhin eih si lo kan nih chuan kan inthlanna hlawhtling kan tih hi a hlawhtling lo ang. Democracy hlawhtlinna chu inthlanah mipui kutthlakna hruaitu kan nei tihah hian a tawp ngawt lova. Mipuite nen inlungruala ram kan enkawl tlan a, ram a lo nawm a, hmasawnna hawi zawnga ke pen hi a ni. Democracy tih hi a hlu ngawt lova, hruaitu leh mipuiten democracy in a tum kan tihhlawhtlin hian a hlutna chu a awm chauh a ni.
Tunah chuan hotu kan nei ta a. Kan hotute thu hi zawm ila, mipui tha kan ni mai. Mahse, kan beisei anga an lo that loh chuan mipui vekin kan paih leh mai ang a. Dik takin ZPM hi an la sawrkar ve ngai lova, an tha dawn nge dawn lo kan la hre lova. Kan enchhin dawn a ni chauh a. Beisei an phak loh hle phei chuan kumhnih kumthumah chuan mipui lungawi lohna a lang chhuak nghal ang. Lungawi lohna a lan loh nan kan hotuten theihtawp han chhuah phawt mai teh se.