Traffic SP Stephen Lalrinawma’n lirthei chetsualna thleng thin zaa 75 chu a khalhtu fimkhur loh vang niin, a dang zawng chu kawng that loh vang a nih thu a sawi.
Nimin zing khan Zoram Drivers’ Union (ZDU)-in Fimkhurna Hapta, Road Safety Week vawi 49-na an hman tur chu Traffic SP hian Chaltlang Lily venga ZDU pisaah a hawng.
ZDU President Zothansanga kaihhruai hawnna inkhawmah ZDU-in fimkhurna hapta a hman thin chu a tangkai thin thu sawiin Traffic SP Stephen Lalrinawma chuan, India rama lirtheia chetsualna thleng thin zaa 75 chu a khalhtu fimkhur tawk loh vang a nih thu a sawi a. A dang zawng chu kawng that loh vang a ni a, hemi avang hian lirtheia chetsualna titlem tura tan lak a tul thu a sawi.
National Crime Record Bureau chhinchhiah danin kum 2022 chhungin ram chhungah lirtheia chetsualna tum 4,61,312 thlengin, mi 1,68,491-in nunna an chân phah a. Stephen Lalrinawma chuan, “Hemi avang hian lirthei khalhtute leh mipuite kan fimkhur a ngai hle a. Lirthei chetsualna thin chhan zingah lirthei khalh laia phone hman te, harhfim lova lirthei khalh leh mutthluk vang te a ni,” a ti.
Mizoram chu ram chhungah road discipline tha ber zingah mi a nih avangin phai lam chanchinbumite pawhin an ngaihven hle niin Traffic SP chuan a sawi a. “Tul lova horn tih rik vak vak awm lote chu state dangten an ram chhunga lirthei khalhtute zirtirna atan an hmang thin,” tiin, dan thar hman a nih hnuah lirthei dan bawhchhiate hremna a na hle a, sum tam tak chawi theihna a nih avangin dan bawhchhe lo tura fimkhur reng a tul thu a sawi bawk.
Traffic SP chuan lirtheia chetsualna tam chhan zinga pakhat chu kawngpui a that vang a ni tiin, tun hnaia Mizoram inkalpawhna kawng siam that leh siam mekte chu siam zawh a nih chuan lirtheia chetsualna a tam theih thu a sawi a. Kawng thaa tlan dan chintawk thiam a pawimawh thu a sawi.
Traffic SP chuan Pathiannia inkhawm tura kalten helmet khum lova lirthei an khalh thin chu tha lo a tih thu leh hei hi dan bawhchhiatna a nih avangin ti tawh lo se a duhthu a sawi bawk.