AIZAWL: Lunglei South Block Mizo National Youth Front (MNYF) chuan MLA inthlanpuia vote chhiar zan khan Lunglei South Bial MNF official candidate Dr K Pachhunga, ex-MLA chu a nunna atana hlauhawm khawpin ZPM worker inti pahnihin vauah puh.
Nimina thuchhuah an siamah Lunglei South Block MNYF chuan, Mizoram Assembly inthlanpuia vote chhiar zanah Dr K Pachhunga chu ZPM worker inti pahnih, ZPM Nghaka Phone No. 8787668287 leh mipa khat (A phone no. lo delete palh) ten diriam taka elsen khumin, a nunna atana hlauhawm khawpin an vau nia tar langin, “Kan lawm lo takzet,” an ti.
An tar lan zel danin, Dr K Pachhunga hi mi thiam leh fel, inngaitlawm, mi dik leh eiruk duh ngai lo, Lunglei South bial tana hnathawk tha, mi retheite hmangaihtu a ni a. A thlavang hauh tur leh ZPM worker-te lak a amah venghim turin an inring reng a ni.
Dr K Pachhunga an amah vautu, ZPM worker inti pahnih hi Pathian hmingin a ngaidam tih tar langin Lunglei South Block MNYF chuan, ropui an tih thu an tar lang tel a, “Amaherawhchu, hetiang a politics vanga mihring nunna atan a hlauhawm khawp a invau hi Zoram politics-ah a la thleng ngai lo a, thleng nawn tawh lo se tih hi kan duh dan a ni,” an ti.