Russia-a parliament in sang zawk chuan March 17, 2024-ah an ram president thlan turin a ti a, President Vladimir Putin-a chu a term nga nana tlin lehna kawng a hnai sawt nia ngaih a ni.
Federal Assembly-a Federation Council chuan Ningani khan vote thlak ni tur hi a pawm a ni.
“Thutlukna siam a nih angin inthlan campaign pawh tan theih a ni,” tiin rorelna in hotu, Valentina Matviyenko chuan a sawi.
A vawi khat nan Ukraine ram chhunga Russia-in a awp -Donetsk, Luhansk, Zaporizhia leh Kherson region-a chengte chuan vote an thlak ve dawn tih a sawi bawk.
Kum 71 mi, Putin-a hian a chuh leh dawn em tih la sawi lo mah se a ni puan a nih tak avang hian a chuh leh tur thu a puan thuai rin a ni.
Kum 2020-a an ram danpui siam that a nih khan nakuma a term kal lai tawp tur bakah hian kum ruk chhung term hnih a la ni thei a ni.
Hetih hun lai hian Russian tam tak chuan danpui siam that hi an thlawp hle a; mahse, sawiseltute erawh chuan nakin zel atana tha lo tur niin an sawi thung.
Russia-a politics virvel a thunun hneh em avangin Putin-a hi tlin leh mai rin a ni a; mahse, a ding dawn em tih a la chiang lo thung.
Amah sawiseltu tam tak chuan a mah khing phak tur langsarte chu lung inah emaw, ram pawnah emaw an khawsa vek niin an sawi a. Ama lamtang lo chanchinte pawh a khap vek niin an sawi.
Lai taka thil thlirtute chuan February, 2022 atanga Ukraine a rûn te, June-a mercenary chief Yevgeny Prigozhin-a a helna hlawhchham ta te khan a dinhmun hi chu tlemin a tihniam deuh niin an ngai.
March-a inthlanah hian a chak a nih chuan kum 2030 thleng thuneihna a chang dawn tihna a ni a. Kum 83 a nih thleng ram a hruai dawn tihna a ni bawk.
Tute nge amah khing dawn tih erawh engmah chiang a la awm thei lo.
Chuh tura inruahman tawh pahnih an awm thung a. MP hlui, Boris Nadezhdin a ni a, Moscow-a municipal council member a ni mek a. Pakhat chu Yekaterina Duntsova niin chanchinbu mi a ni a, Moscow hmar lam, Tver region-a dan hre mi a ni a, tun hmain tual chhung rorel khawlah a awm tawh.
An rorelna in hniam zawk, State Duma-ah political party panga an awm mek a, candidate an neih ngei rin a ni.