Brentford top scorer Bryan Mbeumo chu Brighon & Hove Albion nena an inkhelh tuma a inhliam avangin kar engemaw zat a chawl dawn.
Kum 24 mi hian he inkhelah hian penalty atangin goal a khung a. Tun season a a goal sarihna niin a inkhelh tluan theih loh avangin lakchhuah erawh a ngai.
Brentford manager Thomas Frank chuan, “A inhliam hi a na angreng a, kan tan chuan thil pawi tak a ni. Chiang zawka enfiah a la ni dawn a, chuvangin kar engzat chiah nge a chawlh ngai dawn kan la sawi thei lo.”
“Tun kartawpah Sheffield United erawh a hmachhawn thei dawn lo chiang.” tiin a player chungchang zawhna a chhang.
Mbuemo inhliam avang hian Cameroon in kumthar January 13 a African Cup of Nations khel tura an inbuatsaihna pawh a nghawng thui tura ngaih a ni a. ‘Indomitable Lions’ hian January 15-ah Group C-ah Guinea hmachhawnin tournament bul an tan ang.
Brentford hian first team player pariat chhawr theih loh an nei mek tihna a ni a. Tlarhma bikah an pan belh dawn bawk a, striker rinrawl Ivan Toney hrem a nih avangin an goal nawr a nghawng thui tura ngaih a ni.
Frank pawhin, “Team tan a thawkrim a, winger ni si team tana tlan hnem tak hi an tam lo. Kan goal nawrah player pawimawh a ni a, ball a chanin mawhphurtu a ni ngam. A tih ang ti thei hi kan nei em tih kan hre chho zel ang.” tiin a player dangte tan chona a siam bawk.