Kum 39 a ni tawh dawn chungin LeBron James a la tlahniam reng reng lo. Quarter thum pawh tling lovah point 30 a score a, Los Angeles Lakers in NBA In-Season Tournament final lut turin New Orleans Pelicans 133-89 in an hneh.
T-Mobile Arena a inkhelah James hian point 30 leh assist vawi riat a nei a. Team hmahruaitu tha niin Lakers in inkhel pawimawhah defensive team tha an nihna lantir bawk.
Lakers defense khelhdanin New Orleans chu 35.8% shooting chauh nei theiin a hrek a. Rebounds lakah pawh 59-42 in an inthlau.
Lakers coach Darvin Ham chuan James fakin, “Entawntlak a hmahruaitu a ni ziah a, ani tluk hi an awm lo. Thahrui a ngah a, a tha a za tha hle bawk. A taksa pum a hlan thin a, offense leh defense-ah midang zawng entawn tura kan hmahruai a ni thin.” tiin a fak.
Lakers hian final-ah Indiana Pacers an khel dawn a. NBA a roster pumpui hlawh a pawisa seng tlem ber Pacers hian 128-119 in kumin a NBA champion ni tura rinkai Milwaukee Bucks chu an hneh ve bawk.