- David Zochhuanmawia (Vida Hrahsel Saza)
Kum 2018 MLA inthlanpui kan hmachhawn atanga boruak nei ru tawh, khatih laia a mihring (candidate) lam ngaihtuah hauh lova bial thenkhata Vote hmu tha em em Zoram Peoples Movement (Independent Candidate) te chuan kum 2018 MLA inthlanah Vote an hmuh that avangin an Party Registered pawmsak an ni a. Pawl hrang hrang intelkhawmte chuan kum 2023 a lo herchhuah meuh chuan ZPM Party anga Candidate an ni ta a. An inbeiseina aia sânga chakin Mizoramah sorkar thar an siam ta! Ka lawmpuiin duhsakna sâng ber ka hlan e.
Mipui mimir thinlungah MNF hruaitu ngai kaihhruai ninna leh Congress hruaitu thar kaihhruai la rin tawk lohna (mipui vote-ah a lang vek) nasa tak avangin chiang fahranin Mizoram mipuiten ZPM an thlang tling a. MNF leh Congress insawrkar chhawk nin tawhna thli (wave) avangin leh hmasawnna thar a thlen ngei beiseiin mipuiin VOTE an thlak ta niin a lang.
Pu Lalduhoma, Chief Minister (fr. 8.12.2023) chuan ZPM sorkar atanga ni 100 chhunga an tih tur ruahmanna a puante kha a va tha hlawm tak êm! Ti hlawhtling ngei se a duhawm hle a ni. Mizoram mipuite hian ram tana an thil tih tum daltu ni lova, vaiho Politics thing lutuk ang chhawma inchirhtheh chiam chiam a, buan hmaa kherh an tih ang deuha hna an thawh tak tak hmaa engemaw hlek sawisel chînte hi sim daih ang u.
Social Media kan hman dan pawh hian Kalphung Tharah chuan awmzia nei chho se a duhawm hle a. Mipuite hi kan rilru ngaihtuahna ti hmasawna siam tha (Moral Reform) zel turin inbuatsaih ang u. Party ni ve tho ZPM pawh âtchilh kher lo bawk i la, chuti lo zawng an hnawl hnu Lal Isua iangin Party experience lo nei tawh zawkte kha kan ngai leh chung ang tih a hlauhawm a, ngaih lêt vawng vawng pawh an tul hial thei bawk a. ZPM sorkar hi kan thlir ang a, an tih that kan fak ang a, an kal sual venpui tur turin “Kalphung Thar, Mipui Sorkar” Dekhega!!!
Mihring (candidate) thlir râna inthlang chu ni ngat i la ZPM MLA ni ta zingah hian tling lo tur an awm ve nawk a. thenkhat hi chu tlinpui kum vanneihpui ve tak tak an ni a. Tin, MNF MLA tha tak tak thenkhat an tla phuk phuk maite kha an uiawm hlein a hriat. Congress erawh Opposition MLA 5 atangin pakhat chauh neiin an tla duai duai bawk a. Mahse, Party Senior leh Experience nei MNF leh Congress tan insiam tha chunga tho leh tur chuan tluk bawksawp hmasak a ngai tih an hriat thar lehna tha tak a ni âwm e. Chapona tlâng ata inphahhniam tharte pawh an mamawh viauin a lang.
ZPM in sorkarna a chan tâk avanga ka rilrua rawn lang dawt dawt thil pakhat lian deuh a awm a. Ka bengah hian darbenthek ri thum mi ang te, darbenthek ri fiak mi ang te’n ring takin a ri nawn tluk tluk lehnghal a ni. Aizawl District Volleyball Association chuan April 29, 2023, Season Ending Tournament 2022-2023 Final, Luangmual Branch YMA Hall-a an neih tumin Khuallian atan Pu Lalduhoma, Chief Minister zahawm tak ni ta hi an sawm a. ADVA te’n Mizoram Volleyball Association min sawm tel angin kei leh kan thawhpui pakhatin MVA ai kan awh bawk. Chuta a thusawi chu a ni Volleyball tuimi, hruaitu, Club neitu leh Player-te tana RIMAWI ROPUI BER chu!!!
Pu Lalduhoma chuan, “Mizoram Volleyball pual liau liaua Volleyball khelhna tur Indoor (National Standard Size) in la nei lo hi pawi ka ti hle a. January 7, 2021 khan Republic Veng, Pitarte tlangah Indoor Stadium sakna tur hi Pu Tawnluia, Deputy CM leh Pu Robert Romawia Royte, Sports Minister hovin lung in phum a, mahse tun thlenga a hlawhtlinna in hmu lo hi pawi ka tiin nâ ka ti takzet a ni. ZPM kan sorkar anih chuan Mizoram Volleyball hruaitu, club, players leh a tuimi te hman tangkai turin Volleyball Indoor changtlung tak (National Standard Size) hi tih puitlin ngei kan tum ang,” a ti a. Volleyball tuimi kalkhawm te’n ring leh uar takin kut kan beng dur dur a ni.
Mizoram hmun hrang hrangah Volleyball tuimi leh a khel thin an thahnem em em a. Thingtlangah pawh feh haw paha khelh mai theih a nih avangin Iptepui an nghat rawp a, an khel mai thin a, game awlsam leh nuam tak a ni bawk. Kan Chief Minister zahawm tak ni ta thusawi kha Mizoram Volleyball tuimi te tan a hlawhtlinna ataka hmuh ngei beiseiin, tlumtea thlir takin kan lo thlir reng dawn a. Mizo infiammi, Volleyball khel tute ti hnualtu ni lova, ti phur a, ti hmasawntu an nih ngei theih nan duhsakna sâng ber hlan chungin kan ring kan lo fân ve iâk iâk e.