- Kima Mivam
Sakhuana kan tih hian Kohhran kha kan rilruah lang tel se la. Tun hma Mizo nunhluiah Bawlpu leh Sadawt hun lai pawhin he Sakhuana avang hian sum leh thahrui sen ral a ni tawh thin. Mahse, tunlai Mizoram ang em em a, Sakhuana vanga sum leh thahrui kan sen ral hi a awm lovang tih ngam a ni.
MAHNI HNA AIIN SAKHUANAAH:
Sakhuana lama inhmang thalai tam tak chu intodelh hleithei lovin, hlawh tlemte thawkin an awm ta fur mai. mahni kea ding turin thawhrim a ngai si a, thawkrim tura an hun tam zawk lah Sakhuana in a eiral mek si. Inkhawm chu darkar khat lek tih ni mahse, inkhawm tura in lama haw vang vang ngai te, hun bakah petrol leh tha sen ral te chhut tel a ngai. Tin, thalai pawla inhmang active tak tan phei chuan zan awl hi a tam lo thei khawp mai an ti. Chuvang chu ni mahna, thalai meng rei chhungkaw tana chhawrna tur tlem tak si, zing tho hma ngai reng reng lo hi kan kawl ta tun a ni ang. Zing hun thaah kan mu bo daih hlawm a nih hi maw!
Tun hma deuha hna latu thenkhatin, ‘Kan hnuaia thawk tur chuan Kohhran thalai lama inhmang kan duh lo,’ tih an sawi lan khan, Sakhaw mi thenkhat chuan an haw viau a. Mahse, tun hnaia sumdawng lian hian chu chu an pawm deuh vek tawh ang. Thawk rim tur chuan hun a ngai si. Sakhuana lama inhmang thawkrim duhte pawhin “Active hman ka ni lo,” “Ka inkhawm tha hman lo” etc, an ti zel tawh mai a ni. Chu chu eng dang vang a ni lova, intodelha, midang ring reng lova nun an duh ve a ni. A ni reng lah taka, private firm lama inhlawh tan chuan thalai activity lama inlan ve reng khan mahni hna a chhiat phah ta thin a ni ang. Mahni hnaa kal si, haw hma deuh te, lengchhuak lawk te, chawlh la reng te, hriatthiam ngai bik reng te hi Sawrkar hnathawkah pawh an tam. Office hour chhung ngei pawha dawr hleihtheih loh an tam a ni. Sakhuana vang ni vek mah suh se, tam tak hi chu Sakhuanain a nghawng tih theih a ni ang. Mahni hna thawk tha si lo, Khawtlang/Sakhua lama kan hna chu tha takin kan hlen leh lawi si. Sakhuana hi inphen mawi nan kan hmang mai chauh a tih theih anga, hna tak tak kan thawk lo a tih theih bawk ang.
SAKHUANA VANGA SUM SENRAL A TAM:
Sakhuana vanga kan sum senral hi chik taka zir tan chuan a thahnem hle a ni. Pathian ram thawhlawm ip leh thawhlawm dang atanga sum lut hi thla tin an puang a, Kohhran chanchinbuah te an chhuah ziah thin. Chutah chuan Ramthar pual hi sawi ta bik ila. Pathian ram ip ah hian Ramthar pual column a awm a, Tin, Missionary chawmna ip hran siam a ni bawk. Work camp hi Ramthar field lamah kan nei kum tin a, Synod lam chuan Work camp project list siamin sum thawh tur an rawn ti thar zui. Ramthar field thenkhat ten, ‘inkhawmpui kan dawng dawn si a,’ etc, tiin Kohhranah thil an rawn zawrh tir thlazen bawk si. Kohhran thenkhat chu Ramthar field bik nei kan awm nual a, Para church kan la nei teuh zui. Mizoram pawnah hian Sakhuana vangin kan sum a chhuak hum hum mek a ni. Chutih laiin Ramthar field thenkhatah chuan Mizoram aia tha tha sikul/craft centre/Tuition centre etc an nei daih zawk nia. Ramthar field thenkhat lah kan luhna rei tawh tak, kum 10-30 chuang hnuah pawh Kohhran ngelnghet din thei si lo chungin sum kan seng ral kum tin thin. Kan chhuahsan ngam chiah si lo. Sum chuang liam kan seng reng a ni.
Synod inkhawmpui hian sum renchem an sawi thin na chu, a ren lo ber ber an ni lawi a. Inkhawmpui te naute nen inkhawmpui awm zawng zawng chhui let ringawt pawh hian hei hi sawi ngam a ni ang. Pastor Retreat lam sum an senral zat leh Lay Workers retreat an sum senral inthlauh dan chu a chhui peih tan dah ta zawk ila.
Sakhuana vang hian tullo takin sum kan seng ral teuh tih ngam a ni. Thawhlawm thawh thintute lah mirethei te te anni nawk bawk si. Chhungkuaa Kohhrana inhmang tan phei chuan thla tin Kohhrana sum theh luh hi thahnem tham tak a ni. Pathian ram/Missionary chawmna/ Faith promise (KtP/Pavalai/Kohhran hmeichhia,etc)/Kohhran hmeichhe thla thar thawhlawm/charity pual leh a dang dang te hi thla tin a chhuak a. Inkhawm Thawhlawmah hian Rs 50 puitlingin thawh thin ta se, chhungkaw member 5 chuan thla khatah Rs 2000 chuang a ni daih ang. Ktp/Pavalai/Kohhran hmeichhia inkhawm bil thawhlawm a la tello zui.
TLIPNA: Sakhuana vang hian sum leh thahrui thahnem tak a lo thlawnin a luang ral nasa hle a ni kan tih hian Sakhuana nuai bo emaw, inhnuh hniam lam sawi hi ka duh ber a ni lova, siam that ngai thil awm anga sawi theih ho hi ennawn a tan a duhawm hle zawk a, siam rem theih a awm nual bawk ang.
Hna thawk ve viau anga lang chung si hian kan intodelh hlei thei lova. thalai pawla hruaitu lu chin tan phei chuan hna dang thawk miah lo pawh nise, inkhawm hrang hrang baka, an pawla tih tur hrang hrang kha Pastor hna aiin a hautak fe zawk ang em awt tih theih a ni. Hunpui dawn hnaih phei chuan zan tin hla zir leh drama zir en pui an ngai a. Mahni in luma fate kuah hman lo an awm nawk a, fate kilkawi hman mang lovin an awm fo bawk a ni. chuvang chuan Sakhuana vanga kan sum leh tharui luang ral hi ennawn a hun viau chuan a lang.