Kum 5 chhungin power-a intodelh tumin hma an la dawn a, mipuia an intiam tawh angin kum 5 chhungin electric bill an tisang dawn lo tih Power & Electricity minister F Rodingliana chuan a sawi.
Thawhtanni khan minister hian a pisa a luahlut a, a department chan hotute nen thukhawm zui nghalin, mipuia an lo aupui tawh angin kum 5 chhung electric hman man an tisang dawn lo va, chumi tur chuan theihtawp chhuahpui turin department a sawm tih a sawi.
Hemi tihlawhtling tur hian theihtawpin inrenchem an kalpui dawn a, chutihrualin mipui pawhin ‘duty’ an neih chu power inrenchem a ni, tiin, “Kum 5 chhungin power-a intodelh turin hma kan la dawn a. Power policy ennawn a ni ang a, kum khat chhunga zawh tum a ni,” a ti.
Mini hydel project ho chu tuna la outsource loh pawh outsource vek tum a ni tih a sawi a. Tlawng lui khuah an duh a, Tuivai leh Tuichang pawh tun kum 5 chhunga hma lak zui tum a ni tih a sawi.
“Mipui tan kan inhlan a, official-te pawhin min inhlan pui loh chuan kan hlawhchham dawn. Mipui hnenah sum sem kan tiam ve lo va, sustainable development kalpui kan tum ang bawkin, sustainable electric current neih kan duh a, sustainable mai ni lo vin electric current su nasa lutuk hi mipuiin an tuar a, chumi khuahkhirh dan ngaihtuah a tul,” F Rodingliana hian a ti.
ZPM party-in ‘hand holding policy’ a ruahman chu industry bikah he policy hmang hian ram khaichhuah an tum tih a sawi a. Ni 100 chhunga tihhlawhtlin tur zinga tel, central policy zir tur bik MSME Cell an din dawn a, sum sen belh ngai lovin staff awmsa pawhkhawm a ni ang, tiin Commerce & Industry minister ni bawk hian sawiin, “Industry hi kan ram sum hnar tur a ni,” a ti.
Mizoram Preferential Store Purchase Rules 1994 a taka hman a hun tawh tih a sawi. Kan rama siam leh thar priority-a dah tirna tur a ni tih a sawi a. Kan rama awmsa mau hmang tangkai turin mini paper mill siam tum a nih thu leh hemiah hian interest atan cheng vaibelchhe 5-10 inkar vel dah a ni dawn a, chhungkaw 12000 velin eizawnna atan an hmang thei dawna chhut a ni tih a sawi. A paper bakah pulping lam an ti tel dawn tih a sawi a ni.
“Kan policy hi agriculture based industry deuh vek a ni a, thlai thar lei tur bikah a ching duhte tan soft loan nuai 50 atanga 150 thleng an lak theihna tur budget-a dah tum a ni a. Kum khat chhunga tihhlawhtlin kan tum,” a ti.
Function mumal tawh lo District Industrial Centre tharthawh leh thuam chak nan state sorkar sumin an tum a. A neitu awm lo ang maiin Industrial Growth Centre ho awm chu tuaihnum a, subsidy-a power pek theih nan Power Policy leh Industrial Policy ennawna cheithat a ni dawn tih a sawi a ni.
Printing & Stationery minister F Rodingliana chuan he department hi dah len an tum a, chumi atan chuan zirchian a, chawikan a ni dawn tih a sawi bawk.