Congress hruaitu Rahul Gandhi chuan Prime Minister Narendra Modi chu China hmaa ding ngam lovah puhin ‘mi dawihzep’ tiin a sawi.
Delhi-a Congress headquarter-ah chanchinbumite hmaah he thu hi sawiin Gandhi hian Modi chu India ram chin humhim zo lo leh a koa tlate hlen loah puhin China kutah ram a hlan then niin a sawi.
“Prime minister hi mi dawihzep, China hmaa ding ngam lo a ni. Kan sipaite inpekna hi a hmusit a. Kan sipaite inpekna hi a thlauhthla a. India-ah hian chutiang chuan tuman an ti thiang lo,” tiin Gandhi hian a sawi.
Gandhi-a thu sawi hi MoS Home G.Kishan Reddy chuan chhangin, “A pu (Nehru) kha China hnena India ram petu chu tunge tih zawt rawh se. A chhanna chu a hmu em em ang. Tunge ram pasaltha nia tunge ni lo tih chu mipuiten an hre vek,” a ti.
Gandhi-a hian nimina Defence Minister Rajnath Singh-an Pangong Tso dil hmar leh chhim lama sipai inhnuh kirna tur chungchang a puan tak kha a sawi chhan ber a ni.
Inhnuk kir tura inremna an siamah hian April, 2020 atanga sipaiten Pangong Tso hmar leh chhim lama awm hmun an lo khuar tawhna zawng zawng pawh thiaha a hma anga dah leh turin an inti.