- Ruata
Royal Enfield chuan thla hmasa Motoverse festival-ah khan Shotgun 650 limited edition ‘Motoverse Edition’ an lo phochhuak tawh a. Tunah chuan a production version an phochhuak ta a, kumtharah hian hralhchhuah turin an tlangzarh beisei a ni.
A hmaa limited edition chhuak kha 25 chauh tihchhuah a ni a, tarlan tawh angin hei hi limited edition factory custom a ni. Tuna zalen taka hralhchhuah theih tur version ‘production’ version hi chu a rawng leh design hrang hrangah pawh limited edition nen chuan a inang lo nual dawn a ni.
Royal Enfield Shotgun 650 thar hi rawng chi 4 – Stencil White, Plasma Blue, Green Drill leh Sheetmetal Grey te a awm a. Shotgun hi Royal Enfield 650-Twin platform nghahchhana duan a ni a, he platform hmang hi Royal Enfield bike chhuak mek zingah pathum – Super Meteor 650, Interceptor 650 leh Continental GT 650 te a awm mek a ni. Shotgun 650 hi a hmain a hmel hmang tur hi chu a concept bike, SG650 Concept hmanga duan a ni a, nikum hmasa daih tawh khan EICMA 2021-ah a concept model hi chu an lo phochhuak tawh bawk a ni.
Danglamna hlek hlek awm mahse kawng tam takah hmanni lawka tihchhuah Motoverse edition nen a iang nual a. A kentel zingah hian Super Meteor tr pawhin a neih LED headlight leh Tripper navigation pod te a nei ang a. Single-seater duhthlan tur a awm ang a, pillion seat awm pawhin a lei theih tho bawk a ni. He bike hi a thutna an sang deuh vah bakah handlebar zawl tha tak nei a ni a, a ke dahna hi a bik lai lam deuhah a awm bawk a ni.
A khawl lamah chuan Royal Enfield Shotgun 650 hian Royal Enfield bike hrang hranga a rintlak a ni tih hriatna tura lo hman thin tawh, 648cc, parallel twin, 4-stroke, SOHC, air-cooled engine a hmang dawn a. He khawl hian 46.3hp power chu 7250rpm-ah a pechhuak thei a, 52.3Nm torque chu 5,650rpm-ah a pechhuak thei bawk a ni. Transmission lamah chuan 6-speed gearbox a ni hmang a ni. A tui heh zawng lamah chuan certified fuel economy hi 22kmpl a ni.
Royal Enfield Shotgun 650 hian wheelbase thui tak 1465mm a nei a, ground clearance 140mm a nei bawk a. A dung, a vang leh a san zawng hi a indawt danin 2170mm, 820mm leh 1105mm a ni a, a seat san zawng hi 795mm a ni. He Bobber thar rih zawng hi kerb weight – 240kg niin fuel tank-ah hian 13.8-litre a leng bawk a ni.
He steel tubular spine frame nghahchhana duan bobber thar hian suspension lamah chuan Showa atanga lak USD front fork with 120mm travel leh rear twin-shock absorber with 90mm travel a hmang a. 18-inch front wheel leh 17-inch rear wheel neiin a hma leh hnungah hian a indawt danin 100/90 leh 150/70 section tyre te a hmang a. Brake lamah chuan 320mm front disc leh 300mm rear disc with dual-channel ABS te a hmang bawk a ni.
Royal Enfield hian lirthei market lamah an bike model hrang hrang hmangin hma an sawn nasa hle mai a. Tunah pawh hian an 650cc bike ho mai bakah 350cc khawl ho hian lei a hlawh hle a. Adventure huang lamah lah Himalayan chu an tichhuak deuh chiah bawk a. 650cc huanga duhthlan tur thar a a awm leh hi bike leitute tan thu lawmawm tak a ni a, market lamah pawh an company tih chet that tir tu a nih ngei a beiseiawm a ni.