Maharashtra state sorkar chuan India rama a hmasa ber turin, zu in duhte hnenah an chenn ina pek thlap a tum mek a. Minister for state for excise Chandrashekhar Bawankule chuan zu satute (liquor industry) tana inthlak danglam dawrhna tur thil a nih thu a sawi.
Sorkarin hetianga ruahmanna an siam chhan hi zu rui chunga lirthei khalh an tam lutuk tihbo nan a ni a, “Kan tum ber chu zu rui chunga lirthei khalh, chetsualna thleng leh thil hloh tam lutuk ven nan a ni,” tiin minister chuan a ti a. An ruahman dan chuan khawvel hmun dang leh India-ah pawh a an tih thin ang thovin, website kaltlanga zawrh an tum a, “Miin ni tin mamawh a chah thleng ang tho hi a ni ang,” a ti.
National Crime Records Bureau (NCRB)-in a chhinchhiah dan chuan kum 2015 khan lirtheia chetsualna thleng zinga 1.5% (nuai 4.64) chu rui chunga lirthei khalh vang a ni a. Heng chetsualna thlengah hian mi 6,295-in hliam tuarin mi 2,988 an thi a, ni tin rui chunga lirthei khalh avanga chesuala thi hi mi 8 zel an ni.
Bawankule chuan a zuartute chuan an hralhna tur chu chiang takin an hriat a ngaih dawn thu leh an Aadhaar number thlengin chiang takin an nei a ngai dawn tih a sawi.
A leitu tur bakah hian a zuarte pawh chiang tak hriat theihna turin ruahmanna an siam tih minister chuan a sawi a, um tinah geo-tag an tih chu dahin an lei hun leh a siamtute an hre thei zel dawn a. “He chhinchhiahna (tagging) hi um chhinah a wm ang a. Zu tha lo lo hralh palh leh a ruka hralh (smuggling) thlengin a chhui theih dawn a ni,” a ti.
An state sorkarin hetiang ruahmanna a siam chungchangah hian high court lawyer Shreerang Bhandarkar chuan thil tha tak nia a hriat thu a sawi a. “Miin hun a sen tam tak hum (save) theih a ni ang,” a ti a. “Sorkarin a tum ber, rui chunga lirthei khalh ven a nih dawn bakah thalaite hna siamsakna a ni nghal dawn a. A leituin a duh ang zu ngei a in theih phah dawn bakah a thatna (quality) pawh vil (maintain) theih a ni dawn a ni,” a ti.
Hetih lai hian activist Paromita Goswami ve thung chuan a duh lo va, ani hi zu khap bur (total prohibition) duhtu a ni a. Sorkar ruahmanna siam chu dan lo ang (unconstitutional) niin a sai a, “He thil hian rah chhe tak a nei thei,” a ti bawk a. “India Danpui Article 47 chuan ruih theih in chi (intoxicating drink) chuan thihna leh inhliamna a thlen theih avangin zawrh a khap tlat a. Kan state sorkar hian zu ngawl vei an pun hma ngei hian he a thil ruahman hi ngaihtuah tha leh rawh se,” a ti a ni.