Portugal ram laili lai leh hmar lam chu Inrinni zan zankhua khan thlipui thawk na tak, Hurricane Leslie an tihin a nuai a, nunn chan em awm lo mah se hliam tenau tuar an awm nual a, chenna in 300,000 chu power nei lovin an awm phah mek bawk.
Hurricane Leslie hi darkar khata km 176 (109mph) vela chakin a tleh a. Civil defence thuneitute chuan hliam tuar mi 27 an awm a, ruah thahnem tak a ken telin hmun thenkhatah tui tilian a, thing tam tak a len tlu a, thlawhna tam tak cancel a ni bawk tih an sawi.
Portugal ram nuai tawh zinga thlipui na ber pawl nia sawi hian an ram a kalpel tawh a, nimin tlai lam khan Spain hmar lam a thleng leh mek a ni.
Portugal-ah hian an khawpui, Lisbon leh a chhehvel leh Coimbra leh Leiria district chu a nuai nat zual lai a ni a. Hmar lamah Aveiro, Viseu leh Porto te pawhin an tuar na hle bawk.
Thingkung 1,000 chuang thluin an kawngpui lun ber, A1 motorway pawh a tlang rih lo.
Hmun hrang hrang 1,900 vel atangin chhiatna thleng an dawn tawh thu emergency services chuan an sawi a. Civil defence commander Luis Belo Costa chuan hlauhawm zualpui erawh chuan an ram a pelh tawh avangin hlauhthawn tur a awm tawh lo niin a sawi.