Nagpur, Maharashtra-a mo lawmna ruai thehah mihring ngeih loh zawng ei vang ni ngeia hriatin damdawi inah mi 80 vel dah luh niin police-in an sawi.
December 10-a thil thleng kha niin mo neitu pa, sumdawngin mo an lawmna hmun, resort neitute lakah thubuai thehluhin ruai atana ei tur an sem chu a hing niin a sawi a, a rim pawh a dik lo niin a sawi tih police-in an sawi.
Thubuai thehluhtu, Kailash Batra hian Rajasthani khua anga chei bawl chawlh hmanna hmun, Amravati Road, Nagpur-a mi hi December 9 leh 10 khan a fapa nupui neih lawm nan a hmang niin thubuai a thehluhna, Kamleshwar Police Station-a hotuin a tar lang.
“December 10 chawhnua mo neitu leh mi sawm thenkhatin thil an ei zawhah an pum a nat thu an sawi atangin kan buai tan a. Kan buai zual zel laiin zan lama a lawmnaah ei tur an rawn sem leh pawh a rim a dik lo hle a ni,” a ti.
Thubuai thehluhtu hian he thil hi resort management-ah pawh a thlen a; mahse, engmah tih a ni chuang lo.
“Zan lai velah chuan mikhual 80 vel an luak tan a, an lu a hai bawk a. Damdawi inah dah luh an ni,” a ti.
Superintendent of Police (SP) Harssh Poddar chuan Kalmeshwar Police Station hnenah hian damdawi ina awmte chu an dinhmun chhinchhiaha an enkawl dan pawh hriatpui turin a ti a, chumi azir chuan resort management lakah thubuai ziak lut turin a ti.
Police chuan Nagpur-a Wardhaman Nagar venga mi mal damdawi inah la enkawl mek an ni tih an sawi.