India-a home ministry chuan mi pahnihin parliament rorel inkhawm thukhawm lai luhchilha au chunga meikhu rawng nei an phuh chhuah chu chhui chian turin thupek a chhuah.
Mi pali vel man an ni tawh a, mi dang pahnih hren an ni bawk nia sawi a ni.
An chet chhan hi engmah chianga hriat a la ni lo.
Eptu hruaitute chuan venhimna hlawhchhamna a thleng hi an sawisel a, parliament beih a nih champha kum 22-na chiahah luhchilh leh a ni.
Parliament chhimtute thutna atanga zuang lut mi pahnihte an luh theihna tura phalnaa hming ziaktu, rorel lai, BJP MP Pratap Simha chu hremna pe ngei turin an ti.
Simha a ni emaw, an party an ni emaw, engmah sawi zui an la nei lo.
Nilainia thil a thlen hnuah hian Ningania thutkhawmah chuan parliament building leh a chhehvelah venhimna tihkhauh zual a ni a, luh leh chhuah zung zung a harsar zawk nen complex-ah barricade hun a ni hlawm.
Ningania thutkhawmah eptu MP-ten thil thleng sawiho leh prime minister leh home minister ten thu an neih ngei an phut avangin rorelna in hnih inkhawm tihtawp a ni.
“Thil thleng kha an dem hle ringawt,” tiin Congress MP Adhir Ranjan Chowdhury chuan thuthar lakhawmtute hnenah a sawi.
Rorelna in sang zawk, Rajya Sabha-ah chuan eptu MP, Derek O’Brien-a chu Home Minister Amit Shah-a’n thil thleng chungchang a au chhuahpui ngei a phutna a au chhuahpui dan a mawi loh deuh avangin suspend a ni.
Session tihtawp a nih hma hian Defence Minister Rajnath Singh chuan thil thleng kha ‘tute pawhin’ an dem tih a sawi a. “Tute pawh, rorel lai leh eptu MP-te zawng zawng pawhin, tute nge parliament-a lut thei tura phalna kan pekah fimkhur a ngai a ni,” a ti.
Police hotu sang pakhat chuan parliament building tharah hian venhimna kalpui dan ennawn a nih hma chuan thlawhtute luh phalna pek a ni tawh dawn rih lo tih Reuters a hrilh.
Mipa pathum leh hmeichhe pakhat mante hi Ningani khan court-ah hruai an ni a sawi a ni a, an zavai hian kum 20 leh 30 inkar bawr vel an ni hlawm a. Police hian tute nge an nih an puang lem lo va; mahse, an chhungte chuan tual chhung chanchinbu hrang hrangah an sawi chhuak a, an thlalak leh an hming pawh tar lan a ni.
Nilainia thil thleng kha Lok Sabha-a thleng a ni a. A hma lawkin President Droupadi Murmu, Prime Minister Narendra Modi leh hruaitu dangten kum 2001-a parliament beihnaa thite zahna an hlan a. He beihnaah hian mi pakua an thi a, a beitu mi panga pawh thah vek an ni.
MP-te chuan chhimtute thutna atangin mipa pahnih zuang lutin meikhu rawng nei phuh chhuak thei canister an hmang zui a. Pakhat zawk chu MP-te dawhkanah lawn kaiin a tlan kual a, MP-te leh venhim hna thawktuten man tumin an umzui a ni.
Parliament pawnah mipa leh hmeichhia, meikhu rawng nen phuh chhuak ve tho pawh man an ni a, police-in an hruai lai video pawh a darh.
Mi pali mante hi state hrang hranga mite an ni a, police hotu thenkhat chuan Facebook atanga inhria an ni hlawm niin an sawi a, thil chiang a ni em hriat a ni lo thung.
Parliament pawna awm chanchinbu mi thenkhatin police-in an man hmeichhia chu biak an tum a. Neelam-i a nih thu leh eng pawl mi mah a nih loh thu a insawi a. Mi pangngai ve mai, hna nei lo a nih thu leh sorkarin mipui a hlamchhiah lutuk duh lova lungawi lohna lantir a nih thu a sawi bawk.
Jind district, Haryana-a a chhungte chuan Delhi-ah a kal tih pawh an hre lo tih ANI news agency an hrilh a. “Kan hriat chin chu Hisar, Haryana-ah lehkha zirin a awm tih zawng a ni,” tiin a nutain a sawi.
Neelam-i chhungte hian degree eng emaw zat a nei a, heng zingah hian education-ah masters pawh a tel a; mahse, hna a neih loh chungchang erawh an sawi lo.
“Thiamna sang tak a nei a; mahse, hna a nei chuang si lo va, a tan thih a tha zawk tih a sawi thin,” tiin a nuin ANI a hrilh bawk.
Lungawi lohna a lantirpui hi Amol Shinde, Latur district, Maharashtra a ni ve thung a. An state minister chuan kum eng emaw zat chhung police-ah a intlar tawh thin tih a sawi a. Police pawhin khawiah nge a awm tih an hre lo tih an sawi bawk.
Parliament chhunga lutte hi Manoranjan D, Mysore, Karnataka leh Sagar Sharma, Lucknow, Uttar Pradesh an ni ve thung.
Manoranjan-a pa, Devaraju Gowda chuan a fapa chet dan chu a dem thu thuthar lakhawmtute hnenah a sawi.
“A dik lo tawp… parliament pawnah i ti thei a, tuna mi ang kha chu tih loh tur a ni,” a ti a. A fapa hi engineering degree nei niin an chhungkaw ramah ar, beram leh sangha an vulh niin a sawi bawk.
“Vivekananda (mi fing leh philosopher) lehkhabu a chhiar nasa a. Khawtlang tana thil tha tih duh mi a ni,” a ti a. An chhungkua hi parliament luh phalna petu, Simha-a biala chengte an ni.
Sharma hi video darha parliament dawhkana tlan lawn kha a ni a. A nu, Rani Sharma chuan Lucknow khawpuia tuk-tuk driver a nih thu a sawi.
“Ni hnih kal ta khan a kal bo ta daih a ni,” tiin ANI a hrilh a. “A thiante nen hna thawk turin an kal dawn tih min hrilh,” a ti bawk.
Report thenkhatah mi dang pakhat chu Delhi daia Gurugram-ah man a ni a, pakhat erawh Rajasthan-ah um zui mek a ni bawk tih tar lan a ni a. Heng mipa pahnih hi lungawi lohna lantirtu mante puitu nia puh an ni.