UEFA Champions League a Newcastle United zinkawng a tawp a. AC Milan lakah an tlawm avangin an group ah a mawng berah an awm.
St. James’ Park a Nilaini zanah inkhelah Newcastle United in minute 33-naah goal an khung a. Joelinton pet goal tha tak mai hmangin hma an hruai a. Lehlamah Borussia Dortmund in Paris Saint-Germain laka goal an khung ve bawk avangin Magpies dinhmun a tha.
Mahse French club in an si phurh an sut hnu lawkah Milan pawhin Newcastle lakah goal an khung a. Forward tangkai tak Christin Pulisic chuan Milan si phurh a sut a. Chak tuma inkhel tawp lama an innawr karah Milan goalkeeper Mike Maignan chuan Newcastle goal khung tur a dansak.
Huntawp hma minute ruk a la awmin Milan substitute Samuel Chukwueze chuan an chakna goal a khung zui a. Newcastle dinhmun a chiang.
Newcastle boss Eddie Howe chuan, “Chak kan tum a, Champions League khel zel turin theihtawp kan chhuah. Chance tha pawh kan insiam nual a, mahse kan tling zo ta lo hi na kan ti hle.” tiin inkhel a sawi.
- PSG an vannei
French champion in Champions League knockout stage khel turin kum 17 miWarren Zaire-Emery goal khung an dampui a. An mamawh point hmuh phahin 1-1 in an inhnehtawk.
Westfalenstadion-ah Newcastle leh Milan ten PSG tihsual chu remchangah an la thei tih hria in an thlir uluk hle a. Second half tan hnu lawkah Karim Adeyemi chuan Dortmund hmahruaina goal a khung.
Mahse PSG in minute nga hnuah chhangletin Zaire-Emery chuan an si phurh a sut a. Goal khung belh lo mahse point khat hmuh an tan a tawk.
PSG defender Marquinhos chuan, “Kan group-ah hmahruaitu nih hi kan tum ber nimahsela thil kan thlir thiam a ngai. Engpawh thleng se tlin chian phawt kha kan tan a pawimawh ber a ni.” tiin a sawi.
- Inkhel dang
Nilaini zan inkhel dangah Belgian club Royal Antwerp in UEFA Champions League a an hnehna hmasa ber an chang a. Tling chiang tawh Barcelona lakah 3-2 in hnehna an chang.
Barca in first team player pariat hruai lovin team an siksawi a, Arthur Vermeeren, Vincent Janssen leh George Ilenikhena ten Antwerp tan goal an khung a. Barca tan Ferran Torres leh rawlthar Marc Guiu ten goal an khung.
Group H-ah FC Porto tan Galeno chuan goal hnih a khung a, 5-3 a Shakhtar hnehin knockout stage an lut chiang.
Hnehna chang vek turin Manchester City in Micah Hamilton, Oscar Bobb leh Kalvin Phillips te goal khung an chakpui ve bawk.