Earth Sciences Minister Dr, Harshvardhan chuan Delhi leh a chhehvela hman tur, hma taka boruak a him tawk lo a ni tih hriat theihna tur, Air Quality early warning system chu nimin khan New Delhi-ah a hawng.
He system hi India mi thiamten American leh Finnish model entawn leh puihnaa an duan a ni a, boruak bawlhhlawh dan chu a hmain a tak a thlen hmain a sawi lawk thei dawn a, chumi hmang chuan a lo inven lawk theih dawn a ni.
Systen thar a hawnnaah Minister chuan boruak chhia lo thleng tur hriat hma theih a nih chuan mipuite hnenah hma zawkin hriattirna chhuah theih a ni ang a, chu chu mipuite lo inralrin theih dan tur leh pumpelh theih dan tur pawh a keng tel dawn niin a sawi a ni.
Minister chuan Delhi leh a chhehvela tun hnaia boruak tibawlhhlawhtu lian ber pakhat, an thenawm hnaih state-a lo neituten an buhbal an seng tawhna hnu, a kung leh hnah ro an hal thin chu a tlem hret hret tih sawiin, “Satellite map atanga thlirin Haryana leh Punjab-a hetiang hal awm hi a tlem zel tih hmuh theih a ni,” a ti a. “Heng lai vela awm thuneitute hnenah pawh ngun taka vila tura tih an ni,” a ti bawk.
Dr. Harshvardhan chuan Central Pollution Control Board (CPBC) pawhin Delhi leh a chhehvel boruak chu ngun taka zirin an report pawh a kaihhnawih department-ah an thehluh reng tih a sawi.
“Nikuma Delhi leh a chhehvel boruak ngaihtuah chuan kuminah hian hma kan sawn hle a ni,” a ti bawk.
Delhi-a boruak chhia leng nasa lutuk chungchangah hian Earth Sciences Ministry-a Secretary C.K.Mishra chuan lirtheiten boruak chhia an siam nasa lutuk chu vil a nih thu a sawi a. A bikin khawpui khawchhak lama highway-ah ngun lehzuala vil a nih thu a sawi.