Major General hovin, sipai 7 chu kum 24 liam taa a lema mi an beih avangin thiam loh chantir an ni a, dam chhung lung in tang tura tih an ni.
Major General A.K.Lal, Colonel Thomas Mathew, Colonel R.S.Sibiren, Captain Dilip Singh, Captain Jagdeo Singh, Naik Albindar Singh leh Naik Shivendar Singh te hi Assam-a Tinsukia district-a kum 1994-a dawt phuahchawp tanchhana hmanga mi an beih avangin Summary General Court Martial chuan thiam loh a chantir a ni.
Heng sipaite hian Tinsukia district-ah khaw hrang hrang atangin February 18, 1994 khan mi 9 man khawmin thingpui huan executive pawh an that tel niin Assam Minister hlui leh BJP hruaitu, Jagadish Bhuyan chuan thubuai a thehlut a. Heng sipaite hian an mi man zinga mipa 5 chu ULFA (United Liberation Front of Assam) hel pawla mi an ni tiin an that a, mi dang 4 erawh an chhuah niin a sawi bawk.
Bhuyan hian Gauhati High Court-ah February 22, 1994 khan petition thehlutin heng an mi mante chanchin hi a zawt a. Court hian Indian Army chu hrilh tura a tih angin sipaite hian AASU (All Assam Students Union) hruaitu 5 ruang chu Dholla Police Station-ah an pe bawk.
Court chuan July 16 khan he thubuai hi ngaihtuah tanin July 27-ah a zo a ni.