Kan sawrkar thar hian education leh public health an ngaipawimawh dawn niin a lang a. Ram hmasawnna apiangah hei hi chu ngaihpawimawh ani thin reng a ni. Ram hmasawn lovah he thil pahnih hian ngaihpawimawh a hlawh ngai lo a. Education a that lohna ram hi ram changkang ani ngai lo bawk. Hriselna lam a hniam viauna ramin hma a sawn ngai hek lo. Chuvangin kan sawrkar chuan ngaipawimawh tur dik a hre ta e.
Chutih rual chuan hei hi erawh kan hriat a ngai. Ram hmasawn ni turin a mipui hi education leh hriselna lamah kan changkan a ngai a. Mipuite kan ti hmasawn dawn anih chuan kan ram population a a tam ber thingtlang lam hmasawnna kan ngaihpawimawh hmasak a ngai a ni. Kan khawpui Aizawl ah hian mizoram mipui hmun li a thena hmun khat vel kan cheng a. Hmun thum zawk chu thingtlang lamah an la cheng a ni. Chuvangin thingtlang hmasawnna hi kan dah hmasa tur ani ang.
Kan thingtlang lam hriselna lama in enkawlna la chhiatzia kan hria a. Thingtlang kilkhawr lam chu sawi lovah dah chhin phawt ila. Kan district headquarters damdawiin te pawh hi innghah ngamna tlak a la ni lova. Specialise doctor pawh hi an la nei chau em em a. Doctor ber kan neih siloh chuan damdawiin building ringawt hian awmzia a nei hek lo. Chuvangin kan district headquarters damdawiin te hi mipui innghah ngamna a kan siam a ngai a. Damlohna engemaw hlek a awm pawhiin thingtlangpa tan nei leh nei lova Aizawl pan a ngai a. District hqrs damdawiin thenkhat phei chu nau neihna atan pawh an ring ngam lo hial a ni. Mipui tan Aizawl pan lova damlohna a inenkawlna kan pek that hma loh chuan hma an sawn lovang. Thingtlang mipuiin thlamuang taka an khuaa hna an thawh aa, harsatna an tawh pawha rintlak hospital an neih theih hunah chauh hmasawnna tak tak bul tanna hi kan beisei thei ang.
Tin, doctor tha pek mai bakah kan district headquarters te hi emergency emaw, dam lo na zual enkawlna ICU nena thuam kan tum hram a ngai a. Khawiah pawh natna harsatna hi a thlen theih dan a in ang vek a. ICU mamawh tawh Aizawl lam pan thei tawh silo tam tak, enkawlna tha awm se dam khawchhuak mai tur vui liam hi an tam em em a. ICU hi kan district damdawiinah te hi chuan neih kim hram kan tum a ngai. Sawrkarin a tum chuan theih loh ngawt thu a awm lova. Hun hmasa lama kan thingtlang khuaa infiamna lam infrastructure kan ngaihpawimawh tluk zeta hriselna lam atana infrastructure kan ngaihpawimawh a ngai. Sawrkar hian khawi policy ah nge mipui kan tih lawm tam tih aia khawiah hian nge mipui tan thil tha kan tih tam theih tih ngaihtuahna an hman a ngai a ni.
Tin, sawrkarna changtute hian thingtlang hmasawnna an ngaipawimawh tak tak dawn anih chuan vote politics hi theihnghilh lailawk thei se a duhawm hle. Thalai vote a tam a, thalai tih lawm hian vote a tam tih mai mai hi sawrkarna an chan hnuah hi chuan dah bo hmak sela. Chu ngei chu ram hmangaihtu dik tak, hruaitu tling an ni ang.