Aizawl : Siaha Bawrhsap Lalhmunsanga Hnamte hovin Krismas leh Kumthar vuakveta venhimna kalpui dan tur sawihovin nimin khan a kaihhnawih mipawimawhte an thukhawm.
Bawrhsap chuan Krismas leh kumthar ralmuang leh hlim taka hmang turin venhimna lamah tanlak nasat a tul thu a sawi a. A bikin Siaha District chhung mipui ten zalen leh ralmuang taka he hunpui hi lawm se a duh thu sawiin, mi awmthaduh lo te avangin hunpuiah zalenna leh ralmuanna tha a awm lo palh ang tih a hlauhawm thu leh mipui ten nuam, zalen leh ralmuanna hnuaiah hunpui an hman ngei theih nan sorkar official-te theihtawp chhuah turin a chah.
Siaha SP pawhin Krismas leh kumthar hunpui lo thleng turah mipui ten hlim leh ralmuanna hnuaia hun an hman theih nan hmalak tan mek a nih thu a sawi a. Police- te kutah engkim dah lova khawtlang hruaitute leh mipuite nen thawhhona tha a tul thu sawiin, thawhpuiah a sawm.
Thutkhawmah hian thil pawimawh hrang hrang sawiho a ni a. Halpuah, Halmawi leh puak thei thil dang, boruak tha lo siam thei leh ri bengchheng siam thei chi reng reng bakah naupang silai lem a mu hmang chi reng reng Siaha District-a lakluh, zawrh, hralh, hal leh hman khap turin District Magistrate-in thuchhuah lo siam se, an ti a. Hemi kawnga hmalaknaah khawtlang hruaitute, tlawmngaipawl aiawhte leh mipuite thawhhona thatak awm se an duh thu an sawi.
Zu leh ruihhlo dang reng rengah Excise leh Police ten uar leh khawngzawkin hma la se, an ti a. Hunpui chhungah venhimna tha zawk a awm theih nan Superintendent of Police leh MTP lam ten Duty-na hmun tur leh duty kalpui dan tur felfai zawkin ruahmanna lo siam se, an ti.
Krismas leh kumthar Hunpui lai hian Bazar a lun thin a, mipui tam zawkte mamawh lei a an chhuah thin avaning motor park dan tur leh motor chetvel dan turah ruahmanna felfai tak a awm a tul hle an ti a. Felfai leh awmzia nei zawka motor park a nih theih nan leh motor chevel ah harsatna a awm loh nan DTO, Traffic Police, leh MADC-RTO, LAD lam ten lo sawihoin ruahmannna lo siam se an ti bawk a ni.