- Reuben Lalnunthara Hnamte
Mizote hian Kristmas kan hman tanna hun hi alo rei ve ta hle mai a. Kan hman dan pawh hi a hun a zirin a danglam ve zel a, mahse, kan hman dan tlangpui chu lenkhawm zai leh ruaitheh hi a ni tlangpui a. Thawmhnaw thar neih te, kep silai kah te leh, halpuah leh halmawi chi hrang hrang nen kan hmang thin kha a ni a. Nimahse, tunah chuan kan boruak chhia venhimna tur kawngah halpuah leh a ken tel thilte khap a ni chhova, tun hma ai chuan a rem ta hle a, mahse, halpuah leh halmawi vel a ruka lo chheprelh tawk erawh an awm reng tho. Tun hmma ai kha chuan a zia ta tho tho mai. Thalai leh naupangte hian Kristmas awmzia tak hi an hre lo hle niiin a lang a. Chhungkuaah inzirtirna neih hi a ni lem lo em ni ka ti hial thin. Lal Isua’n min tlan tura kan tana he khawvela alo pianna hun hmang ni si hi Kristmas in a a tum hmang pawh lo hi mi tam zawk kan ni maithei a ni.
Thalai tam tak rilruah chuan Kristmas alo ni dawn chuan nawmchenna lam hawi a lang nghal a. Ngaihzawng nei lo te pawhin neih tur an dap a, urlawk zan vela Ar kanpui tur an dap a, zu leh ruihhlo nen, chu chu thalai tam tak rilrua Kristmas awm dan a ni. Lenkhawmna leh inkhawmnaa kal thalai hmuh tur an tlem thei hle; nawmchenna rilru an put tlat thin avangin Kristmas chu hlimhlawp bawlna ti a an rilrua an put ngheh tlat avangin Kristmas in a tum lam reng reng an rilruah a lut lo a ni. Chutih laiin Kohhran lengkhawm hlim tak tak hriat tur a awm a, vawi tam tak ruai nena nawn a, hlim tak tak hriat tur an awm thin a, a then phei chuan kumthar hnu fe thlenga a la nawn te pawh hriat tur an awm thin a ni. Tunlaiah chuan ram changkang zawkte tih dan la in, khawlai cheimawi leh mahni in te pawh a mawi leh hautak taka chei kan rilruah a a awm ta a, a mawi pawh a mawi thin ngawt mai.
Mi tam zawkte hi chu Kristmas alo thlen dawn hian Bethlehem lam rilruah a awm a, lungte hi a leng deuh ruih mai. Mizo rilruah chuan lenkhawm leh ruaitheh ngei ngei kha thulh theihloh tluk a ni bawk. Kan naupan lai phei chuan Kristmas tuka vawk an han talh ngek ruai ruai te hi a Kristmas riauin kan hria a, vawk phing hampuara pet inchuh reng reng khan hun te kan hmang nuam kan ti thei hle. Thawmhnaw thar han neih a, Kep silai han kah thang thang thinte kha a Kristmas bik riauin kan hre thin kha a ni a, a hunlai chuan nuam ve tak kha a ni. Chutih laiin Thalai tam takte rilrua Kristams awm thin hi tun thlengin ala thi thei lo va, chhungkuaah hian inzirtirna kan nei tam tawk lo nge ni dawn ni. Nula tleirawl tam takin an thianghlimna hloh nan an hmang a, ruihhlo ti ngailo ten ruihhlo tih thar nan te, ngaihzawng neih thar nan te, a awmzia ber chu Setana lawmzawng tih thar nana a hmang thalai an katnawk a ni ber.
Mipat hmeichhiatna avanga HIV kai an tamzia a buaipuitu lamin an sawi chamchi a. Tunah pawh Kristmas kan hmang leh dawn a, HIV kai thar te, sawn pai ta te engzat tak awm leh ang maw le? A rapthlak tih mai tur hi a ni kan Kristmas hman dan tam ber hi chu. Urlawk zan te, kumhlui thlah zan te hian Lal Isua hi lo kal ta thut mai se, mi thianghlim lawr te hi lo thleng thut ta mai se chuan thalai leh nu leh pa tam tak zingah mi thianghlim lawr tur hi an tlem viau ta ve ang. Mi tam takin Kristmas kan hman dan hi kan thlak a tul ngawt mai. Kan Lal Isua tlawm taka he khawvela a lo kalna hun a nih ang hian thinlung tlawm leh rilru thianghlim pu a, Pathian nen inpawlna hun a tan hmang tur kan nih zawk lai hian nawmchenna leh sual khawih duhna rilru hian min eichhe nasa em em ta mai hi in enlet a hun khawp mai. Kristmas a nih avanga nawmchenna rilru kan put thin hi a paih bo ang u hmiang. Chu ai chuan mi harsa leh mi tanpui ngaite tan I luangchhuak ila; ramna Lal a nih anga midangte nen inremna hun a tan I hmang ang u.
Midangtte tana thil tha kan tih tanna hun te, Pathian Thlarau Thianghlima kan khahna hunah te hmang ta ila ava ropui dawn em! Kristian tamna ramah heti taka bawlhlawha Kristmas kan hmang thin hi a rapthlak a ni. Mizoram khaw pakhat, tunah chuan District alo ni ta a, chu mi hmuna kan awmlai chuan Urlawk zan hian hmun danga thuhril tur leh inkhawm tura min sawmna angina ka kal a. Ka lenkhawm nghal avangin zan rei tak hnu ah ka haw a, ka haw kawngah chuan kawngsira lo tawm naupang kum tlinglo, inkawp te te a lo awm, zu leh ruihtheih nena loin terek hi ka hmu hnem khawp mai a, rapthlak hi kan ti khawp mai . Nu leh Pa te pawh hian kan fa te hi kan va thlahdah em! Kristmas a nih avanga rilru zau deuh pu a kan fa te awmdan hre miah lo va kan awm hi a mak mange ka ti a, ka rilru a na hle a ni. Chu chu kum 20 chuang liam daih tawh kha a ni a. Khang ang kha thingtlang khuaah te khawpuiah te Thalai leh naupang tam takin an Kristmas hman dan a nih si chuan kan ram chu ngaihtuahawm tak a ni.
Nu leh pa tam tak hi chuan fa te hi kan laiking fa neih mai mai emaw tih mai tur a ni a. He kan hunpui lo thlen dawnah hian he hun hi chhungkua inpumkhat nan te, midangte tana luanchhuah na hun a tan te, midang kan rem theihlohte nena inremna tan te, Pathian nena kan intawh hun a tan te hmang ila kan Kristmas chu ava ropui dawn em! Thalaite pawhin sual tel lovin hlim taka thiante nen a hlim taka hun hman nan te hmang ila; kan damchhunga kan inchhirna tur leh kan nun tichhetu atan he hunpui hi I hmanglo hram ang u. Kan chhevela sakhaw dang biate pawh hian Kristmas hi chu an hre vek, mahse, an hriat dan hi chu khawvel thil tak a ni a, vai puja ang chauhin an hria a ang ber. Chu chu ringlo mi te pawhin min hmuh dan a nih si chuan kan Kristmas hman dan hi chi Mizote hian kan inenlet a hun khawp mai.