MNF party-in nimin khan an pisaah Exodus Day leh kumin atana an party office kharna inkhawm an hmang a, an president Zoramthanga’n MNF sorkar tla chu Pathian remruat a nih thu a sawi.
MNF president Zorama chuan a kaihhruai sorkar kalta in hripui karah sum harsatna nasa tak an tawk a, central atanga an hmuh tur, lokal ta lo cheng vbc 3000 vel chu leiba chhipchhuan ang reng an ni tih sawiin, hei vang hian beih an tawk a, Development, candidate neih that pawhin awmzia a nei lo a, an phurrit chawk turin Pathianin sorkar thar a ruat ta tih a sawi a, MNF sorkar tla chu Pathiam remruat a ni, a ti.
Zorama chuan, an party MNF chu Pathianin chak takin a siam ngai lo a, dinhmun sangah a dah pawhin, an chapo loh nan a hnuk thla leh thin tih a sawi bawk a ni.
MNF adviser, Minister hlui Dr R Lalthangliana pawhin thu sawiin, MNF chu political party a ni mai lo a, hnam party – hnam movement kengtu a nih thu sawiin, MNF leader pawh tun dinhmunah chuan MNF tana tha ber a nih thu a sawi a. MNF sorkar kalta in sorkar anga a tihtur a tih tawk lohnaah leh mi thinlung a tihnatnaah thupha a chawi bawk a ni.
Exodus day leh party office kharna inkhawm hi MNF Treasurer K. Vanlalauva’n a kaihruai a, Martarte sunna hun hman a ni a. MLA inthlan tluanga neih a nih avangin lawmthu sawina, Sual thuphachawina leh ngaihdam dilna leh Kum 2024 dam taka chuangkai tur leh MNF Party tluang taka a kal theih nan tawngtai rualna hun hman a ni a. Kumthar Hnam Run hawn hun atan January 15, 2024 chu puan a ni bawk.