#Zozam Times Jan 12: High school zirlai ten HIV chungchang zirtirna an dawn theihna tura ram pum huapa buatsaih – National Red Ribbon Quiz Competition, Jaipur, Rajasthan-a vawiina neihah North East aiawha tel Mizoram team – Presbyertian English School, Republic Venga zirlai Zonunsangi (Class VIII) leh Janet Malsawmpuii Ralte (Class IX) te pakhatna an ni.

National Red Ribbon Quiz Competition-ah hian India rampum chu region 4 – North East Region; West & South Region; Central Region leh Northern Region-ah te then niin, region tina pakhatna theuh te chuan vawiin khan National level-a inelna an hmachhawn leh a, North East Region-a pakhatna Mizoram chu National level-ah pawh pakhatna an ni ta a ni.

Red Ribbon Quiz hi National AIDS Control Organization (NACO), Ministry of Health & Family Welfare buatsaih niin, North East aiawha tel Mizoram team te hi Mizoram State AIDS Control Society (MSACS) chuan technical leh financial support pein a tir atangin an buaipui vek a ni.