Italian football club AS Roma chuan an manager Jose Mourinho chu a hna atangin an chawlhtir a, an club mihrâng leh captain hlui Daniele de Rossi chuan a thlak ang.
Kum 60 mi Mourinho hian kum 2021 May khan Roma hi a enkawl tan a, a hnuaiah Europa Conference League title an la a, nikum khan Europa League final a hruai thleng leh bawk.
Mahse tualchhung league lamah erawh tun season-ah an che tha tluang tawk thin lova, pakuanaah awm mekin UEFA Champions League khel pha tur dinhmun chu point nga in an hlat mek a. Kar hmasa khan Coppa Italia atangin an hmelma Lazio in an pet chhuak tawh.
Season tawp a contract hmang zo tur Mourinho hi Lazio nen an inkhelh tum hian red card a hmu a, a zawna red card hmuh a nihna niin Pathianni khan AC Milan lakah league-ah an tlawm leh bawk a ni.
Kum 40 mi De Rossi hian season tawp thleng Roma hi enkawl turin inremna an ziak ve thung a. Kum 2001 leh 2019 inkar khan Roma tan vawi 616 a inkhel hman.
Kum 2020 khan inkhelh a chawlhsan hnuah manager atangin Serie B club SPAL ah hna a thawk tawh a. Match 17 enkawl hmangin February thla khan chhuahtir a ni ve thung.
“Team kaihruaitu a lo nih tawh thin angin season tawp thleng tha takin min kaihruai thei tih kan hria.” tiin Roma neitute chuan an sawi.