Kumin Chapchar Kut hman dan tur relin nimin khan organising committee chairman, Chief Minister Lalduhoma hoin an thukhawm.
CM Conference-a thutkhawmah hian committee chuan Chapchar Kût ni hi ni khat hman an rel a. Kût pa tur leh kût thlengtu turte an ruat bakah kût hmanna tur sum, district leh Mizoram House-a sem darh dan turte an siam fel nghal bawk.
Chapchar Kût hmanna tur sum hi sorkar budget-ah dah a ni ngai lo va, kum tina hman thin, ni pawimawh a nih avangin nakkum atang chuan sorkar budget-a dah a nih tawh tur thu chairman chuan a sawi.
Kumin Chapchar Kût thupui atan ‘Zonun Zemawi – Tlawmngaihna’ tih chu thlan a ni.
Thutkhawmah hian sub-committee din tul awmte leh souvenir editorial board an din a, department dangte nena thawhhona awm thei te, exhibition buatsaih dan tur te, food court buatsaih theih dan tur te leh thil pawimawh dang te an sawi ho bawk.