Aizawl: Aizawl South II bialtu MLA Lalchhuanthanga chuan nimin khan a bial chhunga sorkar hmun pawimawh hrang hrangte tlawhin, hmalak ngai leh siam that ngaite a enfiah.
ITI venga, Aizawla Sports & Youth Services department hnuaia Auatics Association of Mizoram in an enkawl swimming pool a tlawhnaah Lalchhuanthanga chuan, sorkarin hmun tha leh ropui a neih, thalai tam tak India ram mai nilo khawvela swimming lama intihsiaknaa tel thei tura intuaihriamna a nei tih hi Mizoram mipui tam zawkin an hriat a rin loh thu a sawi a. “He hmun hi sorkar kal ta ten sum tam tak seng a an lo din tawh, hetiang a hlamchhiah lutuk a ni hi a pawi tak zet zet a ni,” tiin, sorkar tharah chuan tangkai taka thalaiten an hman theih tura chhawpchhuah an tum dawn niin a sawi.
Industrial Training Institute (ITI) tlawh lehin, MLA chuan, kum 1975 atang tawha Mizoram thalaiten mahnia eizawnna an neih theihna tur atan a zirna hmun a neih pawimawh berte zing a mi a nih thu sawiin, “He hmun atanga zir chhuak mi tam takin eizawnna mumal tak an nei tawh a. ZPM Policy pawimawh ber zing a mi entrepreneurship nen a inzawm tlat a, kan CM pawh hian a ngai pawimawhin tih changtlun dan kawng kan dap zel dawn a ni,” a ti.
Lalchhuanthanga chuan ITI chu tun hmain enkawl that a hlawh loh thu leh a building-te a hlui tawhin zirna atana hmanruai te a tunlai tawh loh thu a sawi a. Mi tam zawkin mahni a eizawnna an neih theihna tur atan tun ai tha a thuam chak turin theih tawpin hma an lak tur thu a sawi bawk.
Aizawl South II bialtu MLA hian Urban Health Centre, ITI leh Salem Veng Aizawl World Bank Road lei thlahniam tlawh a tlawh bawk.