Mizoramah social media hmanga dan bawhchhiatna thubuai ziah luh tur a kum telin a pung zel a, tun hnai kum li chhungin thubuai 267 ziah luh a ni a, sum lam kaihhnawih (financial crime) thubuai atam ber.
Cyber Crime Police Station hotuten an sawi danin kum 2020-2023 kum li chhung khan thubuai chi hrang hrang 267 an ziak lut a, chung zingah chuan sum lam kaihhnawih (financial crime) thubuai tam berin 160 ziah luh a ni a, thubuai an ziah luh zawng zawng atangin za zela 59.92 a ni.
A dawt chu mipat hmeichhiatna lam kaihhnawih niin, thubuai ziah luh tam lama pathimna chu nihna inruksak a ni.
Kum li chhungin social media hmanga dan bawhchhiatnaah mi 81 manin, pawisaa inbumna thubuai an buaipuia sum an hmuh let chu Rs. 66,57,244 a tling a ni.
Kum kalta bikah, 2023 chhung kha thubuai 72 ziah luhah mi 28 an man a, thubuai zinga tam ber chu sum lam kaihhnawih tho a ni a, thubuai 38 ziah luh a ni.
A dawtah mipat hmeichhiatna lam kaihhnawih (sexual harrasment) niin, thubuai 19 ziah luh a ni a, a dangte chu mipat hmeichhiatna thila naupang kaihhnawih (child pornography) thubuai panga, nihna inruksak (indentity theft) thubuai pasarih, hacking thubuai pakhat leh thubuai dang pahnih te a ni.