Kan ramah sawrkar hnathawk in daih loh thu hi kan hre lar viau a. Department tinah hian thawktu indaih ti hi an awm mang lo. An in daih loh thu sawi thei vek an ni. Sawrkar department te hian post ruak hnawhkhah loh an neih tamzia hi an sawi theuh hlawm.
Amaherawhchu India ram state dangte ngaihtuah chuan population atanga chhuta sawrkar hnathawk nei tam ber kan ni hial ang.
In daih lo kan tih hi engnge a chhan ni ta ber ang. Khawi office ah pawh hian kal ila hnathawk mang lova awm mai mai hi an tam em em lawi si. A hminga han chhiar a tam dul si in daih lo hi kan ang deuh tlat mai a. A bik takin field work lam hian in daih lo hi an inti zual a. Helam hi chu an lo in daih lo tak tak anih pawhin thil dik ani thei tho a. Amaherawh chu kan sawrkar hnathawkte hi an tam leh tlem lama chhut aiin an hnathawh zat zawngin chhut ila a fuh ber hmel. Hnathawktu mi 20 awmna hian thlakhatah hna engzatnge an thawh theih, eng anga buai nge an nih, an thawhchhuah zat lam hi kan en ngai em? Awm tur zat nia an hriat (post hnawhkhah loh) aia an tlem hian thawktu in daih lo an inti mai te hi a ni thei lo maw tihte hi zawhna a ni ta. Entirnan – PWD ah hian field lam khawihtu SA kan tih ang hi engzatnge an neih? JE engzatnge an neih. Chung JE leh SA te chuan kawng kilometre engzatnge an enkawl? Building lamah building sak lai engzatnge an enkawl? Revenue department ah surveyor an in daih loh thu a lar hle. Surveyor pakhatin thlakhat chhungin ram engtiatnge a chinfel tihte pawh hi chhut chian a tha khawp mai. Department tam takah driver an awm dul mai a. Mahse, motor khalh tur in daih lo an ni nual hlawm. Chutih laiin MR a thawk driver an la awm teuh bawk.
Thawktu in daih lo tih hian work management lam hi ngaihtuah tel a tha a. Private company ah thawktu tlemte in hna tam tak an thawk thei thin a. Sawrkar department a thawktu tam tur a ngai a, in daih lo ti ta te pawh hi a awm thei tlat a ni. Private firm a thawk aia hlawh tam zawk an ni chung hian private firm aia an thawk tlem bik anih ringawt phei chuan a dik thei tawh lovang. Mizote hian sawrkar hnathawh hi kan lo thiam lutuk ta mah mah emaw ni aw tih theihna tur lai hi a tam mai.
Kan sawrkar hnathawkte in daih lo lai hi en nawn a tul a. Mamawh miah loh kan lo chhawr dul mai anih phei chuan post tam tak hi nuai bo a tha zawk ngei ang. Tunhma a tha lo siamtha tura inpe sawrkar kan nei thar a. Kan sawrkar department te pawh hi a bul atanga en that hi ngam sela. A in daih lo lai tak tak chu lak belh sela, a chuang bang awm anga lang hi nuaibo ngam bawk sela.