India-a thlawhna thuneitu (aviation regulator) chuan thlawhna thlawk tur tihkhawtlai leh thulh a tam lutuk avanga mipuiin an lungawi loh thu social media-a an au chhuahpui hnuah airline-te tan kaihhruaina thar a siam.
Regulator hian airline-te chu ‘a hma thei ang bera’ zin thulh thu puang tur leh passenger-te hnenah tihkhawtlai a nih chhan pawh a hun dik tak zelah hrilh thin turin a ti.
Airline-te chuan an zin tur thulh leh chhuah hun tihkhawtlai chhan berah hian Delhi-a chhum leivak zing nasa lutuk an puh.
Passenger tam tak chuan airline leh tumhmun puhin inbiakpawh that tawk loh vang niin an chhal hlawm.
Mipa pakhat chu IndiGo airline thlawhna khalhtu pakhat zawk (co-pilot) nena inhnial buaia kut hial thlaka puh chu man niin bail-a chhuah leh tawh a ni a. He pa hi Pathianni khan a thlawh hun darkar 10 chuangin tihkhawtlaisak a ni a. Video darh pakhatah chuan thlawhna chhunga co-pilot thupuang lai chu panin a tibuai a ni.
Video darh dangah pawh passenger-ten Mumbai tumhmuna intlarnaah chaw an ei lai a lang a, heng mite hi Goa atanga Delhi an pan tur chu rei tak tihkhawtlai an nih hnuah an kawng thlaksak an ni bawk.
Pathianni tuk atanga chhum leivak chhah takin tumhmun lun ber pawl awmna, Delhi a tuam avangin tual chhunga thlawk tur tam tak chu tihkhawtlai a ni hlawm a. Delhi hi India-a airline lian tak tak hmunpui pawh niin heng zingah hian IndiGo leh Air India te pawh an tel.
Chhum leivak zing hi kum tin dan a ni a, kumin bikah erawh thlawhna thlawh dan tihdanglam hi tumhmuna thlawhna ding lai a tam avang leh tlankawng thenkhat siam that a nih avanga khar a nih avangin a tam zual nia sawi a ni.
Pathianni atanga an buai intan hi Thawhtanniah pawh a la ziaawm lo va, Thawhlehni thleng pawh khan a la nih chhunzawm bawk.
Weather department chuan Delhi leh hmar lam khawpui dangah chhum zing hi ni hnih vel a la awh dawn niin an sawi a. Rel zin chhuak tur tam tak pawh tihkhawtlai an ni bawk.
Pathianniah khan passenger tam tak chuan Union Aviation Minister Jyotiraditya Scindia leh airline tam tak chu X-ah an lungawi loh thu an tar lannaah an thai lang tel (tag) hlawm a. Mi thenkhat chuan tui leh ei tur pawh awm lovin thlawhna chhungah rei tak an thu a, an chhuah hun tur engmah hrilh chian an nih loh vang niin an tar lang hlawm.
Thawhtanni chawhnuah khan Scindia chuan X-ah vek thlawhna tihkhawtlai leh zin thulh chhan hi sei tak ziakin a tar lang a, a chhan berah Pathiannia Delhi-a ‘beisei loh tak chhum leivak zing’ chu a puh bawk.
“…Darkar eng emaw zat chhung khaw hmuh thui theih zawng a inthlak reng a, zing dar 5 atanga dar 9 inkarah phei chuan zero-ah a thla thla hman a. Thuneituten chet chhuah loh mai an ti lo thei ta lo va, CAT III runway-ah hetiang dinhmunah chet theihna a awm lo,” a ti.
Scindia hian ‘mawi lo taka chetna’ chu pawmzam chi a nih loh thu leh dan anga hma lak a nih tur thu a tar lang bawk.
Minister hian Thawhlehnia Directorate General of Civil Aviation-in kaihhruaina a siam pawh tha a tih thu a sawi leh a, India-a tumhmun lian zawng zawngah passenger-te thil tawn ching fela enpuitu tur ‘war room’ siam vek a nih thu a tar lang bawk.
IndiGo chuan an hnuaia mi kutthlak chu chhui chian a nih tur thu an puang ve tawh bawk.