Hyundai chuan an mid-size SUV lar leh hralh kal tak ni mek Creta chu hmel thar puin a chi thar an tlangzarh leh ta!
Hyundai hian Creta hmel thar hi a man tlawm ber E petrol manual variant Rs. Nuai 11 (ex-showroom) man atanga tannin Rs. Nuai 20 (ex-showroom) man a top variant SX(O) diesel automatic thleng a awm a. Hriat tur erawh chu heng a man tarlan te hi an tihchhuah tirh offer ang deuhin, introductory price a ni a, a man hi a la pun hret beisei a ni.
- A pawn lam landan
Hyundai Creta thar hi a hmabawr a rawn danglam viau mai a, hmel thar mawi tak Hyundai hian an rawn put tir a ni. A hma grille thar lian zawk, Hyundai ina parametric detail an tih design kan hmu a. Split headlamp. LED DRL awm tel kan hmu a, a grille chungah light bar a awm bawk a ni. A hnunglam pawh a hmaa chhuak aiin a pian a danglam hret a, a hma aiin a tlang kual vel chu a rawn ki lehzual a, a hnungah hian bumper design thar kan hmu bawk a ni. Heng bakah hian a pawnlam landanah danglamna neuh neuh kan hmu bawk a ni.
- A chhunglam
A chhunglama danglamna langsar deuh chu a dashboard thar hi a ni a. 10.25 inch touchscreen thar software update thar bakah 10.25 inch digital driver display Alcazar-a mi ang kan hmu a. A centre console-ah pawh dual zone climate control system thar thununna tur te dah belh niin a chhung rawng hi a hma aia eng zawk hman niin copper details hmanga chei a ni bawk a. A hnunga thu te tana hmanraw awm hrang hrang chu a hmaa mi nen a inang tlangpui a. A chhung zau zawng hrim hrim pawh hi a danglam vak lo a, hmun awl zau zawng hi 433 litres a la ni reng a ni.
Tunlai thiamna hmanraw changkang a ken tel hrang hrang zingah – powered driver seat, dual-zone climate control, air purifier, electronic parking brake, two-step adjustable rear seat backrest, pillow rear seat headrest, rear sunshade, 360-degree camera thar, Bose sound system, connected tech – Jio Saavn music streaming app thar leh thil dang dang kan hmu a.
Himna hmanraw lamah pawh thil thar kan hmu bawk a. Heng te hi airbag 6, a variant sang hoah radar & camera-based ADAS, ADAS function hrang hrang – auto emergency braking, adaptive cruise control with stop and go, lane keep assist leh adangte kan hmu a. Heng bakah hian Hyundai chuan Creta thar chu chetsualnaa a him lehzual nan a body chu an tichak lehzual niin an sawi a ni.
- A khawl
A khawl lama thil thar lian deuh chu 160hp power pechhuak thei, 1.5-litre turbo-petrol engine thar a ni a. Hei hian a hmaa 140hp power pechhuak thei, 1.4-litre turbo-petrol khawl a rawn thlak a ni.
115hp, 1.5-litre petrol leh 116hp, 1.5-litre diesel engine te chu a ngai angin a la awm chhunzawm zel dawn bawk a ni.