Mizoram in kan mamawh em em oil chhekkhawlna lian tham siamna turin sawrkarin hmun a zawn thu a lo lang ta. Thu lawmawm lam a ni. State kan nih hmaa Brig T Sailo hun laia oil dahna hmun lian lo tak, mahse vawiin ni thlenga kan la hman tangkai nisi Vairengte bula mi hi kan neihchhun a la ni reng a. State pawn lam nena buai emaw, kan lakluhna kawng silchar lamah buaina a chhuak emaw, engamah hma a kan lo buai ve nghal ngawtna chu oil chungchang hi a ni. Vaiho lah hi an sual thiam si a. Oil tel lova kan chan chhiatzia an hrechiang em em a. Kalkawng dan hi an awlsam khawp mai. Oil dahkhawlna kan neih loh hi kan huaisen tur anga kan huai ngam loh fo na pawh a ni.
He harsatna hi kan sawrkar kal tawhte leh tuna kan sawrkar thar pawh hian an hrechiang em em a. Congress hun lai atang tawh khan a hmun tur hi an zawng tawh a. Mnf sawrkarah pawh ram neitute nen thui tak an inbe rem tawh tihah harsatna a awm leh a. Vawiin nia kan sawrkar tharin a kal hmasate lo buaipui a buaipui zui chat hi a lawmawm takzet a. Hlawhtling ngei turin mahni theihna mualah mipui pawhin ngaihven pui a tha hle.
Oil depot lian hi state sawrkar siam tur ani lova. Kalphung pangngaiah chuan sawrkarin ram a ngaihtuah a, a hmun siam (construction) zawng zawng leh enkawl hi oil company lam hna a ni thung a. Ram kan neih chuan rawn tih theih hi oil company lam pawh hian an duh thu an lo sawi fo tawh a ni. Mahse, hetiang oil depot lian tham siam hi thil namai ani lova. Kangmei chhuak thut thei lakah te thil hlauhawm anih avangin mipui awmna hmuna din rup mai chi a ni lova. Mipui ngheng lo deuha siam ngai a ni. Tin, tuizem siam satliah ang ngawt ani lova, hmun zau tak a duh a. A enkawltute chenna hmun turte nen a zim berah Acre 15 lai ram a ngai niin sawi a ni a. Chuvangin ram rem hi a awm mawh hle. Anmahni lam oil company hi tribal an nih loh avangin kan ramah ram an nei thiang lova. Ram pek hi chu kan mawh ani tlat mai a. Kan sawrkarin ram pek tur a nieh theihna tura sum a lo seng deuh anih pawhin mipui tana tha turah chuan phur taka kan support a tha ang.
Amaherawh chu hetiang thil lian tham hi chuti maia tih zung zung theih ani lova. Kan sawrkarin ram an pe thei ta anih pawhin oil company hian a siamna tur budget te an han siam ve ang a. Company chuan a sak lam an tan theih hun tur pawh sawi theih a la ni lovang. Buai hlek a awma kan manganna fo oil dahna buaipuitute hlawhtlin ngei theih nan hian i tawngtai pui ang u. Chu chu kan ram leh hnam himna kawng pakhat a ni.