- Debbie Rinawmi
January thla hi chu bultanna leh hma thar lakna thla a nih avangin mitin maiin beiseina thar kan nei a, kan tha a thona thla a tih theih awm. Julian leh Gregorian calendar-a thla hmasa ber niin a hming tobul chu Rom-ho pathian Janus hming chawia sak a ni. Kum hluia kawng dik lo zawh palh te pawhin ‘kumtharah chuan…’ tih thupuiah kan nei a. Chu kumthar chu a lo thleng ta a, chuvang chuan January hian ‘danglamna thlentu’ tih te pawh a inhmeh viau a ni. Taksaa hma thar kan lak hma hauh pawhin kan rilru chuan a tha zawnga hmasawn duhna lam a hawi tawh avangin rilru lamah hmasawnna a thleng tawh a ni.
January thla hi ‘dry’ thla a ni. A changin ‘dry’ state ah kan inpuang a; a chang leh kan inpuang lo bawk a. Kum tawpah hunpui lian tak tak pahnih kan hmachhawn; mi thenkhat chuan he hunpui atan hian a hma thla tam la awm atangin an inpuahchah thin a, sumdawngte pawhin ‘ber’ thla a thlen phat atangin bungrua te la tharin he kumtawp hunpui atan hian an inbuatsaih thin a. Chutiang chuan he hunpui hi mitin tih theih turin kan er thin a ni. Chung inbuatsaihna zingah chuan ruihthilthil pawh hi a bang hauh lo. A in thin te chuan an lo in ‘stock’ sa a, rawlthar leh tleirawl thenkhat tan chuan in chhinna hun a ni bawk a. Thenkhat tan chuan heng huna harhfima awm kha thil zahthlak tak a ni a; nidanga lirtheia nungchang pangngai nena chuang mai thin kha hunpuiah chuan khek tuarh tuarh kha thil tihtur tul a lo ni a. Chutianga Zolawn khuaa zu zuar in anga ‘dry’ lo thin pawh kha kumthara January thla chuan kai tawh chuan ‘dry’ loh kha thil zahthlak tak a ni a. January thla pawha ‘dry’ lo chu ‘dry’ lo kumtluan tura ngaihna a lian hle a. Chhungkhat leh duhsaktu tawngkamah pawh ‘kum a thar bawk a, nun thar nen’ tih tawngkam a ri zing hle a, chu chuan beiseina fei lian tak a kawk a ni.
January thla chu ‘inhmakhua’ thla a ni. He thla pawimawhna pakhat chu kumtluan atana inhmakhuana thla a nihna hi a ni. Zirlai board exam leh exam hrang hrang hmachhawn tur tan pawh hlawhtling ngei tura zir tan lehna thla a ni a. Zalen taka hunpui hman lai chuan tu nu leh pa mahin an fate lehkha zir turin an tir lo tlangpui a, chuvangin January-a tui taka lehkha zir tur chuan luhlul taka beih a ngai a, thawhrimna leh tumruhna nena he thla hi hman a ngai a ni. Chutiang chuan sumdawng mite, office kal thinte leh eizawnna hrang hrang neite tan pawh he thla hi chu a pawimawh a, kum tluana tuh rah seng tur tam tak chu he thlaah hian a innghat a tih theih ang. ‘Bul tan that chu chanve zo ang a ni’ tih thufing ang deuhin January thla hian hlawhtlinna leh hlawhchhamna hmawr a keng tel ve ve a ni.
January thla hi ‘intiamna’ thla a ni. January thlaah hian mi tam tak chuan kumtluana tih tur leh tih loh tur hmachhawp insiamin mahni intiamna hial an nei thin a. Hei hian tumruhna leh hmasawn tumna nasa tak a keng tel a, hmasawn zawnga mimal than zelna atan a pawimawh hle a. Motivational speaker tam tak an awm a, eizawn nana hmang hialte pawh an awm a ni. January thlaah hi chuan chutiang ang a hrana mamawh kan tlem hunlai tak a ni awm e. He thu I chhiar pah khan han inzawtin han inngaihtuah la, January thla hi chu thil tha I chak hunlai leh hnathawk tura I phur hunlai, hma thar cho taka I hmachhawn hunlai a ni ngei ang.
January thla hi ‘taihmak’ thla a ni. January thla hi thla tha tak ni mahse taihmakna tel lo chuan rah tha a chhuak tak tak thei chuang lo. December thlaah kawng tinrengin kan inthlahdah a. Kum tluana sum leh paia insum te pawhin December thlaah hi chuan kan thilphal viau a; ei leh in kan tihna kawngah leh kan lei kawngah te, thawmhnaw lei kawngah te pawh kan inphal zau hunlai leh inthlahdah hunlai, nunphunga kan thatchhiat hunlai ber a ni a. Chutianga ni 31 tawp kan awm hnua taihmak han chhuah chu thil harsa tak mai a ni a. Hemi hunlai tak, January thlaa taihmak chhuahte erawh chuan a rah tel tur an nei deuh ngei ngeiin a hriat a, thla khata taihmak chhuah tih theih lo tamzia pawh an hmuchhuak thin a ni.
January thla hi ‘rahchhuah lanna’ thla a ni. Ka tar lan tawh angin December thlaah mi tam tak chu nun inthlahdah takin kan nung a, chu chu January thlaah hian a rah a lo lang chhuak thin a. Ruihtheihthil bakah ei leh ina insum lohnain hrisel lohna bakah thauna a thlenin mi tam tak tan awm nawm lohna, mahni taksa duh khawp lohna leh mahni inhmuh dan tha lo tak a siam thin a. Chuvangin, January thla hi kan thiltihte lan chhuahna thla a ni a; beiseina thla tiin a eng zawngin sawi thin mah ila, chutianga thlir tur chuan tumruhna nena hmathlir a ngai awm e.
January thla hi sikni eng mawi tak ang a ni. Zan hian natna leh hrehawmna, beidawnna leh thimna a keng a, a fawn vel hlup hlup thin a. Ni a chhuah erawh chuan chung thimna te chu an tawmim a, beiseina leh lawmnain hringfate a hmuak thin a. Chu ni hma thleng phate chuan thil tha ti tur leh beisei turin hun an nei a ni. Chtiang chiah chuan January sikni eng a lo lan a, chu ni eng chu hmu thei tura kan nunna zuah a la nih chuan kan inthlahdah rah tel dawn mah ila, kan tan hunin zah a la ngai tihna a ni a; bul tan thata insiamthat nan hun kan la nei tihna a ni a, beiseina leh hmathlir tam tak a keng a ni.
Ni khat atan ni khat hrehawm chu a tawk a ni (Matthaia 6:34) tih ang deuhin January thla hi tha taka hman tum ila, beiseina leh tumruhna thlah lovin hmasawn tumin ke pen ila; February thla chu tha tharin huaisenna thar nen kan la hmachhawn leh ang chu, hunin kan chungah zah a la ngai cheu a nih chuan.