Aizawl: January 16, 2024 zan dar 9:44 khan SDPO, Saitual leh N Lungpher VDP tangrual chuan Myanmar atanga lak luh kuhva bag 100 (truck trip khat) N Lungpher ram chhungah an man.
Home Minister K Sapdanga’n a social media account hrang hranga a tar lan danin, kuhva hi Zokhawthar bul, Tiau Lui kam, Laipian kai, Myanmar ram atanga lak a ni a. Champhai Khankawn Police check gate helin, Zokhawthar – Champhai Zotlang hel kawng – Rabung – Saichal Road – Lungpher – Buhban – Chalfilh Vanzau – Khanpui-Hmunnghak – Seling – Aizawl an pan a ni.
Kuhva neitu hi Mawii, Thuampui, Aizawl niin, Ashok Leyland (R/No. MZO4 A 6621) a phurh a ni. Lirthei neitu hi Rinawma, Champhai Electric Veng niin, Zosangliana (18), Champhai Venglaiin a khalh a, handyman chu Laltlankima (18) a ni.
Kuhvate hi escort niin, escort motor chu Suzuki Super Carry. (R/No. MZ04 A 7120) a ni a, Lalthlamuana (34), Champhai Kanan ta niin, amahin a khalh nghal a. Handyman hian kum a la tling lo thung.
Home Minister K Sapdanga chuan danin a kawng a zawh zel theihna atana rim taka thawktu Mizoram Police leh home department te, sorkar tha tichaktu khawtlang tangrual pawlte chungah thinlung leh tihtak zetin lawmthu a sawi thu tar langin, “Kan ramah hian dan in awmzia a neih a, dan rorelna (rule of law)-in a kawng a zawh zel theihna turin Zoram mipuite tanrualpuiah ka sawm tak meuh che u a ni,” a ti.