Chief Minister Lalduhoma chuan Headquarters 23 Sector Assam Rifles ten Mizo thalai, sum leh paia harsate tan a thlawna NEET/JEE entrance test inbuatsaihna coaching centre a kalpui mek chu nimin khan a tlawh a, Aizawl Zokhawsanga AR hmunah Sentinel Centre hi siam a ni a, chief minister hian zirlai naupangte chenna building leh an hmunhma dangte a ensak a, naupangte nen hian thingpui an inho bawk.
Inkawmna hun neiin, an nihlawhzia hriaa theihtawp chhuah turin zirlaite chu a fuih a. An hnua la zir ve turte tan pawha entawntlak ni tur leh an tum ber, NEET/JEE entrance exam paltlang ngei turin a chah.
Hetiang coaching centre tha, a thlawna zirna ni bawk an buatsaih avangin, 23 Sector Assam Rifle, NIEDO leh Axis Bank te chungah lawmthu a sawi bawk.
Centre hi Assam Rifle te hian National Integrity & Education Development Organisation (NIEDO) leh Axis Bank te nena tangkawpa hma an lak a ni a. Kum li chhung kalpui turin ruahmanna an siam a, kum khatah zirlai 30 vel zel lain, mi thiam bikten coaching an pe a, residential niin engkim a thlawnin zirlaite hian an dawng vek a ni.