AH & Vety Minister C Lalsawivunga chuan ui seh avanga natna thihpui an awm thin chu pawi a tih thu sawiin, kum 2030 ral hma ngeia ui seh natna umbo a nih theih nan theihtawp chhuah turin AH&Vety department hotute a chah.
Nimina Khatla-a Royale Lalawi Hotel Conference Hall-ah Health & Family Welfare department buatsaihin ni hnih awh tur, ui seh natna (rabies) umbo nana Action Plan Workshop neih a ni. He huna khualluan AH &Vety Minister C Lalsawivunga chuan ranvulh, a bik taka mihring chenpui nasat ui chu venhim tlat a, vaccine lak tur lamah tan lak a tul thu a sawiin, “Ui mai bakah ran hran hran pawh natna laka venhimna vaccination theihtawp chhuaha pek chu kan tihmakmawh a ni,” a ti.
AH & Vety department chuan theihtawp chhuaha ranvulhte natna laka venhim chu an ngaih pawimawh hmasak a tul tih sawiin, “Ui seh natna thihpui kan awm thin chu a pawi tak zet a. Kum 2030 ral hma ngeia ui seh natna um bo a nih theih nana theihtawp chhuah a tul tak meuh a ni,” a ti bawk.
He huna Khualzahawm Zarzokimi, Jt. Secretary, UD&PA & DM&R chuan Aizawl Municipal Corporation leh Lunglei Municipal Council-ah District Office kaltlangin kum 2030 ral hma-a rabies natna um bo a nih ngei theih nan an department enkawl kaltlangin dan leh hrai mumal tak siama hnathawh an tum thu a sawi.