Secretary, Labour, Employment, Skill Development & Entrepreneurship Lalramsanga Sailo Pisa-ah nimin khan Air Force sipai, Agnipath Scheme Agniveervayu lakna atana registration kaihhnawih chungchang sawihoin 11 Airmen Selection Centre, IAF a Wing Commander BS Rathore hovin an thutkhawm.
Wing Commander BS Rathore chuan Air Force sipai lak dan chungchang sawizauin Mizo thalai a tam thei ang berin he Scheme hi hmelhriat se a duh thu leh Scheme chungchang Awareness pek kawngah State Sawrkar chu thawhpui a duh thu a sawi a. Meeting-ah hian Awareness pek dan kawng hrang hrangte sawiho nghal a nih bakah Mizoram atanga Candidate Application tam dan azirin Exam Centre Aizawl-a buatsaih dan zawn ni se, an ti bawk.
Sorkar thuchhuahin a tarlan danin Indian Air Force-in Agnipath Scheme hnuaia Agniveervayu lakna tur a tihchhuah angin Online Registration chu ni 17 January atanga ni 6 February 2024 thleng hawn a ni a. Thalai mipa leh hmeichhia, ni 2 January 2004 leh ni 2 July, 2007 inkara piang, pawl 12 pass tan he hna hi dil theih a ni.
Agniveervayu-a tling te chuan kum 4 chhung thlatin Rs.30- 000 – Rs.40000/- an hlawh ang a. Kum 4 an thawh hnu ah nuai 11 a hlawma pek an nih dawn bakah nuai 48 Life Insurance cover premium free pek vek an ni dawn a. Kum 4 an thawh hnuah hian 25% te chu thawk chhunzawm tura lak an ni ang a, a dang 75% te chu Central leh State Sawrkar-ah leh Corporation-ah te an thawh theih nan hmalakpui an ni dawn tih sorkar thuchhuah chuan a tarlang bawk.