Aizawl : East Tuipui bialtu MLA Ramthanmawia’n SASCI 2022-2023 sum hmanga sak mek Khawbung Bazar Shed Phase I chu nimin khan a tlawh.
Khawbung Bazar Shed Phase I hi SASCI sum cheng nuai 40 hmanga sak niin, a sak hna chu contract a pek ni lovin, Khawbung VCP hovin Prominent Citizens te nen Bazar Shed Committee dinin, chu mite chuan uluk takin rotling ngei tura sak tumin an bei mek tih sawrkar thuchhuah chuan a tarlang.
Bialtu MLA chuan Bazar Shed tha taka an sak avangin Committee chungah lawmthu a sawi a. Tun sak tura tih chin sa zo thuai tura hma la tura chahin, SASCI 2023-2024 hmanga tuna sak chin bak chu Phase II hmanga sak chhunzawm leh tur a nih thu sawiin, Khawbung in Bazar Shed tha tak an nei thuai tur chu a lawmpui thu a sawi bawk.
Khawbung Bazar Shed hi a dung 38 feet a vang 30 feet niin, Phase I SASCI 2022-2023 leh Phase II SASCI 2023-2024 hmanga sak tur a ruahman a ni a. Khawbung Bazar Shed sakna tur Phase II SASCI 2023-2024 hnuaia Nuai 30 dah chu sawrkar tharin an la stay avangin hman theih a la ni lo.
Ramthanmawia chuan nimin vek khan Khawbung HSS Girls Hostel sak mek pawh a enpui a. An Office chu a tet avanga Extend an dil chu MLA hian theihtawp a chhuahpui tur thu a hrilh a. Khawbung HSS ah hian Arts leh Science Stream awmin School naupang 85 an awm a ni.
Khuangthing Studens Union Office-Cum-Library MLA fund nuai 4 senga sak pawh nimin vek khan bialtu MLA Ramthanmawia chuan a hawng bawk.