Australia-a khawchin zirtute chuan tun hnaia ram kang tuar nasa ber zinga mi, Victoria state-ah ruah tam tham tak a sur dawn niin an hmu lawk a, a sur a nih chuan ram kang an buaipui ang bawkin tui lian an buaipui a ngai dawn tih an sawi.
Australia-ah hian ram nasa taka a kan hnuah ni rei vak lo kal ta atang khan ruah tam tham tak an dawng a. Hei hian ram kang mek tam tak a timit a; mahse, hmun tam takah power supply a chhiat phah a, kawngpui dan rih a ngai nual bawk.
September atanga ram kang an tawrh mekah hian mi 28 vel thi tawhin chenna in sang tel a kang chhe tawh a, ram acre maktaduai tam tak a kang chhe tawh bawk.
Ram kang mek zel tur hi ruah sur leh khaw vawtin a tihmih mek laiin hmabak hautak tak tawn tur an nei dawn niin a lang.
Prime Minister Scott Morrison chuan ram kang an tawrh avanga chhiatna thlengah intundin leh nan sorkarin A $ mt 76 ($ mtd 52) vel a pek chhuah dawn thu a sawi a. Heng sum hi mamawh zualpui, tun atana tih theih mai tih nan a nih thu sawiin an ram chuan an chanchina chona lian ber an hmachhawn mek tih a sawi.
Australian Tourism Industry Council chuan ram kangin a tihchhiat hi A $ tld 1 a tlin a rinawm thu an sawi a. Australian Tourism Export Council erawh chuan A $ tld 4.5 zet an hloh niin an sawi ve thung.