Aizawl: Republic Day 2024 denchhena ram pum huap sikul band te inelna – National School band Competition-ah Government Mizo High School (mipa pipe band) te an tel dawn.
National School band competition hi January 21 leh 22, 2024 khian New Delhi-a National Stadium-ah neih tur a ni.
National School Band competition hi sorkar laipuia Ministry of Education leh Ministry of Defence tangkawp ten kum 2017 atang khan buatsaihin, category paliah inelna neih a ni thin.
National Level Competition a tel tur hian Zone pali – Eastern, Western, Northern leh Southern Zone-ah te inelna hi neih niin zawhfel a ni tawh a. Eastern Zone-a intihsiakna, December 2023 a neiha Government Mizo High School Pipe Band (Mipa) te hi a titha ber niin Eastern Zone aiawha National Level a tel tura thlan an ni.
National School Band Competition ah hian Zone hrang hrang atangin category tinah school pakhat zel an tel dawn a, a vaiin school 16 chu he inelna hian an intihsiak dawn a. Zonal competition hrang hrang neiha school band 73 tel atangin Zone tinah a category tina ti tha berte chu National Level-a tel tura thlan a ni.
Government Mizo High School Pipe Band hi kum 2000 a din niin, Mizoram a Independence leh Republic Day lawmna ah te tum engemaw zat an lo tel tawh a. Hemi bakah kum 2007 khan NCC RDC Delhi ah pawh inlan tawhin, Prime Minister’s Rally-ah pawh an thiamna an lo entir tawh bawk.