Lai Autonomous District Council-a (LADC) education department hna lak leh thawktu hlawh Rs 1,33,56,884 tihchingpen chungchangah khatihlaia education changtu, Executive Member V Zirsanga leh mi eng emaw zat thiam loh chantir an ni.
Aizawl district court-a Special Judge (Prevention of Corruption Act) Dr HTC Lalrinchhanga chuan nimin khan court thuremna puangin, court thutluknain a tar lan danin kum 2013 khan LADC-ah Work Education zirtirtu mi 41 te April leh May thla hlawh chu LADC-in pe tawh anga insawiin LADC EM, kum 2013-a Education (Middle School) changtu V. Zirsanga leh a thurualpui mi pangate’n Mizoram sorkar thuneitute bumin Lawngtlai Treasury Office atangin Rs 1,33,56,884 an la chhuak a ni.
He pawisa atang hian, khatih laia Lawngtlai Sub Hqr Middle School Teachers Assn President NC Muankima chu Rs 3,00,000 eiru a puh a ni a, Hetih hun laia Mizoram sorkar hnuaia Lawngtlaia DEO hna chelhtu Lalduna Chinzah chu Rs 73,37,220 eirua puh a ni a. Lawngtlai pisaa DEO a thawk tho Ramengzauva chu Rs 30,00,000 lo eiru a puh a ni bawk. NC Muankima leh khatih laia Lawngtlai Sub Hqr Middle School Teachers Assn Secy C Lalchawiliana te hian Rs 50,00,000 chu Lalduna Chinzah hnen atangin June 27, 2013 khan la chhuak in, heta tang hian V. Zirsanga hian Rs 21,00,000 lo eiru a puh a ni bawk.
Thubuai kalpui a nih lai hian Ramengzauva leh H. Lalruatkima te hi vanduai thlak takin an boral hlauh mai a, anmahni bik chu court chuan ngaihhnathiamna a nei thung.
Hei bakah hian zirtirtute leh thawktu dangte mi 31-te chu thiamna lama tul lehkha lem hmanga dik lo taka lak luha puh an nih bakah, a tlangpuiin kum 1992 vela lo thawk tawh angin an service book lem an siam bakah hetih hunlai vela hna atana lakna lehkha lem neiha puh niin, an chungchangah thiamloh chantir an ni bawk.
Zirtirtu leh thawktu dang mi 31 zinga pakhat chu thubuai kalpui laiin vanduaithlak takin a thi a, a thubuai bik hi ngaihtuah theih a ni lo.
Court in thiamloh a chantir te hremna tur hi karleh Thawhtanni ah puan a ni ang.