Khawvela mihring tamna ber, China rama mihring chengte punna chu nikum khan mtd 15.23 a tling a, an punna hi a tlahniam hret hret zel.
National Bureau of Statistics chuan nimin khan China rama mihring cheng zat hi mi tld 1.395 a ni tawh tih a tar lang a; mahse, an punna zat hi kum hmasa atanga chhutin 0.38% chauh a ni.
China rama mihring cheng zingah hian hmeichhia aiin mipa chu mtd 30 velin an tam zawk a. Heti taka mipa an tam zawk chhan hi an ram mihring pung chak lutuk ven nana fa pakhat chauh hrin (one-child policy) an kalpui mekah nupa reng rengin hmeichhia aia mipa fa an duh vang zawk nia ngaih a ni.
Sorkar chuan an ram mipui hi kum 2029-ah chuan tld 1.442 an tlin tawh an ring a; mahse, hetianga a kum tela an punna a tlakhniam hret hret avang hian an tlin loh theih mai pawh an inring tawh.
China-ah hian kum 2016 leh 2017 khan mi mtd 17 chuang ve vein an pung a, hei hi one-child policy an kalpui an tihtawp leh hun lai vel a ni a. He policy hi titawp tawh mah se an punna hi a hniam zawngin a la kal zui ta tho a ni.
China dawta mihring chen tamna ber, India-ah pawh mihring pung zat hi a tlem ve hret hret zel tih hriat a ni bawk a. United Nations-in a chhinchhiah dan chuan tun thlaah hian tld 1.362 vel India-ah hian an cheng mek a a ni.