Jallikattu hi India chhim lam, a bikin Tamil Nadu-a an infiamna ngainat leh lawm hlawh a ni a, bawng kawlh, mihringin chhaiha tihzal tuma an beihna a ni a, infiamna atthlak leh huaisei ngai tak a ni.
Pathianni khan Viralimalai, Pudukottai district-a he thil an tihnaah hian Guinness record thar an siam a, tum khata bawng kawlh an chhaih tam ber niin bawng 1,353 zet an inlan a; mahse, a entute zinga mi 2 an thi ve thung.
Thite hi Trichy district-a mi, Soriyampatti khua, Ramu (35) leh Jeeyapuram khua, Sathish Kumar (28) te an ni a. Bawng kawlh thinrimin a entute thutna a phinnaah a hmunah Ramu hi a thi nghal a, Sathish erawh Manapparai GH-ah a thi thung tih Pudukkottai district police chuan an sawi.
Anni bakah hian bawng kawlh chhaihtu (bull tamer) 31 zetin hliam an tuar bawk.
Viralimalai Jallikkattu-ah hian doctor 90 leh damdawi lam thawk mi 90 inrintir an ni a. An tihna hmun bul chiahah hian operation theatre dinin rikrum thila che tura inrintir an ni.
Viralimalai hi Tamil Nadu health minister C.Vijaya Bhaskar-a pianna hmun a ni a, Pathiannia event pawh hi ama hmalaknaa tih a ni a. Chief minister Edappadi K.Palaniswami leh a deputy O.Panneerselvam te chuan an hawng nghe nghe.
Palaniswami chuan Jallikkattu an tihna hmunpui dang – Alanganallur, Avaniyapuram leh Palamedu Jallikkattu event bakah chuan Viralimalai Jallikkattu hi Jallikkattu chanchina hmun pawimawh a ni reng tawh dawn tih a sawi.
Viralimalai Jallikattu committee chuan bawng 2,000 inlan tura an beisei thu leh a hun hnaiah bawng thenkhat damlo an awm tak avangin 1,353 chauh an inlan theih tak thu an sawi a, a chhaihtu hi mi 800 an ni thung a. Madurai, Pudukkottai, Trichy, Thanjavur, Coimbatore leh Sivaganga district atangin an tel hlawm a ni.
Madurai Jallikkattu-a bawng 647 inlan chu khumin Jallikkattu tum khat a bawng inlan hnem ber niin Guinness record thar an siam ta tho a ni.