Ayodhya-a Ram Mandir hlan thiang hlim, ‘Pran Prathistha’ chu Thawhtannia neih turin ruahmanna engkim peih a ni ta.
Temple hlanna inkhawm hi chhun dar 12:20-ah tan a ni ang a, minute 40 chhung vel hun hmangin chawhnu dar 1:00-ah zawh hman tura tih a ni a. Inkhawm hun chhung hi rei lo mah se zing atangin a lawmna hun erawh hman tan a nih rin a ni.
Shri Ram Janmabhoomi Temple hlan leh hawnna ni nghal hi Prime Minister Narendra Modi pawhin a telpui dawn a. Uttar Pradesh Chief Minister Yogi Adityanath, RSS chief Mohan Bhagwat, Uttar Pradesh Governor Anandiben Patel, leh temple trust president Mahant Nritya Gopal Das te pawh an tel ang.
A hawnna inkhawmah hian mi 7,000 vel tel tura sawm an ni a. An zingah hian cricket legend Sachin Tendulkar, Virat Kohli leh MS Dhoni te, Bollywood superstar Amitabh Bachchan, Rajnikant, Anushka Sharma, Alia Bhatt leh Ranbir Kapoor te, industrialist Mukesh Ambani leh Gautam Adani te pawh an tel.
Infosys dintu, NR Narayana Murthy leh a nupui, lehkhabu ziaktu, Sudha Murty te hnenah pawh sawmna pek an ni a. L&T Group hotu, S N Subrahmanyan, Olympic gold medallist Neeraj Chopra, Olympic silver medallist PV Sindhu leh cricketer hlui, Venkatesh Prasad te pawh sawm an ni bawk.
Ram Temple hawn tur pual hian state hrang hranga sorkar pisa, board leh corporation te chu chawlh an puang a, thenkhat chuan chawhnu chawlh an puang hlawm bawk.
Ayodhya Ram mandir hi Hindu sakhaw hmun pawimawh ber zinga mi a ni a. Ayodhya hi Lord Ram-a pianna hmun nia ngaih a nih avangin hmun thianghlimah an ngai.
Temple sakna tur hian August 5, 2020 khan Prime Minister Modi-a’n a lung a phum.
Temple chhunga an ngaihhlut tak, ‘Ram Lalla’ lim (idol) hi milim ker thiam, Karnataka-a mi, Arun Yogiraj-a siam niininches 51-a sang niin tonne 1.5-a rit a ni.
A limah hian Lord Ram hi mipa naupang kum nga mi anga siam niin a ding a, ama lim an siamna lung tho hmanga chher lotus a keng.
Milim hi Zirtawpni khan hawn a ni tawh a, a hmel chiang taka a lan bakah rangkachak thal leh fei a keng tel bawk.
Temple hi Shri Ram Janmabhoomi Teerth Kshetra-in an enkawl a ni a. He trust hi Supreme Court thupeka sorkar laipuiin a enkawltu tura a din a ni a, a sak hna pawh enpuiin acre 2.7-a zauvin an sa niin an website-ah an tar lang.
Ram Temple sak hna hi Larsen & Toubro (L&T)-in an sak a ni a, technical lam hi Indian Institute of Technology (IIT)-in an pui bawk.
Shri Ram Janmabhoomi Teerth Kshetra hian kum 2022 khan a sak nan Rs. Vaibelchhe 1,800 an ruahman a. Nikum October khan PTI chuan February 5, 2020 leh March 31, 2023 inkar khan Rs. Vaibelchhe 900 an hmang tawh niin an tar lang.
Ayodhya-a Ram Mandir hi lirthei, rel leh thlawhnaa awlsam taka thlen zung zung theih turin tih a ni a. Tun hnai lawk khan temple khawpui tlawh a awlsam nan Ayidhya-ah hian Maharishi Valmiki Airport hawn a ni a. Prime Minister Modi-a’n tun hnai lawkah Ayodhya leh New Delhi inkara tlan tur Vande Bharat Express a vai liam bawk.
Sorkar leh mi mal bus pawh Ayodhya kal tam tak tlan tur a awm reng a. Lucknow, Gorakhpur, Delhi leh khawpui lian dang atanga Ayodhya panna tur bus hi Uttar Pradesh Transport Corporation chuan a ruahman vek bawk.
Ram Mandir hi Thawhtannia hlan thianghlim leh hawn a nih hnuah a tuk atangin vantlangin Pathian biak (darshan) nan an hmang thei dawn a. Ni tin hun hnih hawn a ni ang a, zing dar 7:00 leh chawhma dar 11:30 inkar leh chawhnu dar 2:00 leh zan dar 7:00 inkar a ni ang.
Sakhaw biaknaa tel turte hian trust-in a pek chhuah phalna neih a ngai a, ID dik tak nen chauh a luh theih dawn a ni.