Hunpui lai an hman that loh avangin Arsenal in league title an chuh puite an pha lo hman a, nimahsela an intlansiaknaah an dinhmun siamtha turin Crystal Palace lakah goal nga an khung.
Inrinni zana Emirates Stadium a inkhelah Gunners hian Premier League bika an match hnuhnung panga atang vawi thum chauh hnehna chang an ni a. Inelna hrang hrangah December 17 hnuah chak hmel an la hmu leh lo.
Mikel Arteta pawlten league a season harsa hmang mek Palace lakah hian minute 11-naah Gabriel Magalhaes hmangin goal hmasa ber an khung a. Corner atang bawk an goal hnihna lut zuiin Crystal Palace goalkeeper Dean Henderson chuan an lamah a ti lut.
Second half-ah Arsenal bawk langsarin Leandro Trossard-a’n an goal thumna a khung hnuah Gabriel Martinelli chuan huntawp hma in goal hnih a khung leh bawk.
Arsenal boss Mikel Arteta chuan, “Goal nga kan khung a, kan chak bakah goal kan venhim avangin ka lawm hle.”
“Liverpool nen kan inkhelh zawh khan ka rilru in beiseina lian tak ka nei a, kan kheltha chungin result tha kan nei lo chauh a ni tih ka hria. Vawiin ang hi kan hlat lo tih ka hria.” tiin a sawi.