- Dr. Lalhriatpuia, Psychiatrist
- Eng nge zu chu?
Zu kan tih chu Sap tawnga ‘Alcohol’ kan tih telna chi hi a ni mai a, rakzu a ni emaw zufang a ni emaw, beer leh wine a ni emaw, thlai hrang hrang um atanga siam chhuah a ni a. Alcohol pai chi hrim hrim beer emaw, wine emaw, breezer emaw pawh ni se, zu hian a huam tel vek a ni.
- Zu hna thawh dan:
Zu hi thisena a tam dan level azirin a thawk thin a. Pack 1-2 an in hian thisen a ti lum a, tha \ang \ungte a ti hahdamin, mahni inven runnate tihniamin tawngte a tizang chhova. An han in belh leh a thisena a level 100% aia sang a nih chhoh chuan taksa chet a ti diklo tana, kal ngil te a har chho tan a, fing taka thutlukna siam a har chho thin. In belha thisen level-a 200% aia a tam chhoh hnu phei chuan hriat-rengna (memory) in siam tur tibuaiin, a tukah a hma zana an awmdante an hrechhuak hlei thei lo thin. Chumi level aia sangah phei chuan thluak function hlei thei tawh lovin nikhaw hre lovin an chatthla thin.
- Taksa a khawih chhiat dan tlangpui:
Zu hian direct takin nerve a khawih a, a ti chhe thin. Chu mai ni lovin zu in nasat vanga vitamin leh mineral tlakchham vang pawhin nerve hi a chhe bawk. Zu in nasa chu an thluak a sawng te a, kum 40 mi lek pawn kum 70 thluak ang khawp an nei thei. Hei vang hian taksa chet a dik lova, hriatrengna a tlem a, kuke mu chum chum an ngah duh hle.
Zu hi zaa 90 chu thinin a lo sawngbawl avangin thin hi a tuartu langsar pakhat a ni. Zu in nasaah chuan a tirah thin hi thau chhiain a bawha, thin bawl tuk tuk an nei thin. Chumi hnuah thin natna (Alcoholic hepatits) siamin mit liam an nei a, an eng pup a, luak leh taksa chauin an awm thin. Hemi hnu hi chuan thin hi a ser tan a, a ser nasat hnuah thinro (cirrhosis) a siam thin. Hemi hnuah hi chuan thlak (transplant) loh chuan chhan ngaihna a awm lo. Hetia thin a that loh chuan kalte, thluakte a ti buai nghal thin a. Hei hian thisen zam pumpuiah te ti lian in a puah phei chuan Internal bleeding-in an thi thin.
Pumpui thau bawh (pancrease) kan tih hi a hnathawh a ti buai a, pumna vak vak a siam thin. Lung natna a siam a, chuap a chak loh phah thin a, pumpui a tha thei lova, mipat hmeichhiatnaah an tlahniam a, cancer neihna chance a sang nghal bawk.
- Zu nghei thut hlauhawm zia:
Zu hi chhun zan zawma in a nih hnuah chuan thluak hi lo inher remin zu nen hna a thawk pangai tawh zawk a, an in loh hlekin an buai tawh zawk thin.
Chu mai a ni lova an lo in rei tawh phei chuan an nunna atan a hlauhawm a, natna dang nei miah loh pawhin zu nghei thut hi thihpui theih a ni. Zu hi darkar 8 an in loh atangin an kut a rawn khur tan a, thlanfimin bualin, hlauhthawnna a lo kal nghal bawk thin. Luak chhuak ngawih ngawihin an awm a, chaw an pai hlei thei lo thin. Chutah an lo in nasat phei chuan kaih angin an chiri a, a nasat phei chuan an vai ruai a, tam takin thil mak tak tak an rin tlat a, tihnat tumtu awm tlat ten hriain, in ven nasat a ngai hle thin. Hetia an vaih chinah chuan thihpui chance za a sawm an nei nghal. Chu mai nilova an vaih laia inawkhlum, inchung sang atanga zuang thla leh mahni in vit sawi tur an awm nuk. A tlangpuiin suffer hian ni 7-10 a awh thin. Zu hi damdawi hmang lo chuan nghei thut chi a ni lo.
- Zu in thiam an awm em?
Kan hriat reng tur chu ruihhlo hrim hrim hi chu kan thluaka thawk, rilru ti danglam thei a nih avangin thiam taka in emaw tih har tak a ni. Zu vanga thi tam tak hian chhun zan zawmin an in nghal bik lo.
A tirah hunbik neiah an in a, a lo rei deuha a zing tial tial a, kar tawp chauha in thin atangin zantinah a kai chhova, zantin atangin zingkarahte in chhovin a ngawl vei an ni chho thin. Mi insumthei tak, mi bik tlemte ho chuan an control reng thei a ni mai thei, mi nawlpui tan chuan in loh a him ber. Bakah tih than hnu phei chuan zu telloa picnic chu a kim lo riau tana, hlimna lam leh lungngaihna lamah chhuanlama zu in pha a awl hle thin. Zu hmuh mai vangin in chakna a chhuak lova, inpui thinte, in thinna hmunte, lak thinna hmunte an hmuh pawn lung a ti leng em em zela, in nasaah phei chuan lung ti lengtu a tam lutuka, insum a har tawh thin. A in nasa ho pawh hian an duh bak bakin a control let tawh avangin an in thin.