Zo rimawi khawvela band ngainathlawh leh hriat hlawh ni bawk MALTA zaipu Lalhmangaiha (63) chu nimin tlai khan Bethlehem vengah vuiliam a ni.
Hmangaiha hi hun rei tak cancer natna in a tlakbuak hnu-ah nimin zing dar 7:30 vel khan a boral.
MALTA original pahnih Hmangaiha (Vocalist) hian a thiantha leh bandmate ni bawk, Lalnunpuia (Drummer) a zui ve ta a ni.
Hmangaiha hian naupang leh puitling thleng pawh a lawm hlawh hla thahnem tak phuahin, a hit pui hle.
Pa fing leh ril, fiamthu thiam a nih bakah a bula awm nuam tak, titi thiam bawk si a ni a, a boral thu hian mi tam tak a barakhaih.
Zo rimawi khawvel tan paw’n channa nasa tak a tling a, a hmunruak luah a harsa hle ang.